Тақдимот билан Озарбайжон Президенти Илҳом Алиев Ўзбекистон Президенти Шавкат Мирзиёев билан биргаликда Янги Тошкентга ташрифи чоғида танишди.
Янги Тошкент ҳудуди 20 минг гектарни ташкил этади. Келгуси саккиз йил ичида бу ерда 200 мингта хонадон қуриш режалаштирилган. Истиқболда шаҳар 2 миллион нафаргача аҳолини қабул қилиши мумкин.
Лойиҳанинг биринчи босқичида замонавий турар-жой мажмуалари, ижтимоий ва бизнес объектлари, шунингдек, таълим ва маданият муассасалари барпо этилади.
Лойиҳа доирасида Шавкат Мирзиёев ва Илҳом Алиев Ўзбекистон Миллий педагогика университети Низомий номидаги янги кампусининг очилиш маросимида ҳам иштирок этдилар.
Бундан ташқари, шаҳарда давлат муассасалари, илмий ва маданий марказлар, меҳмонхоналар, сервис ва бизнес мажмуалари қурилади.
Шаҳарни барпо этишда замонавий шаҳарсозлик, «яшил шаҳар» ва энергия самарадорлиги тамойилларига алоҳида эътибор қаратилган. Муҳандислик коммуникацияларини ер остига жойлаштириш, энергия тежовчи технологиялардан фойдаланиш, кенг кўламли яшил ҳудудлар ва жамоат жойларини яратиш кўзда тутилган.
Янги шаҳарнинг муҳим таркибий қисми транспорт инфратузилмаси бўлади. Янги кўприклар, метро линияси, пиёдалар ва велосипед йўлаклари Янги Тошкентни пойтахтнинг мавжуд қисми билан узвий боғлайди.
Эслатиб ўтамиз, 2023 йил март ойида Ўзбекистонда Янги Тошкент қурилишига старт берилган эди.