Ташкилий қўмита маълумотларига кўра, бу йилги Бутунжаҳон кўчманчилар ўйинларида 3 мингга яқин спортчи иштирок этади.
Спортчиларнинг шахсий маълумотлари Ўйинларнинг расмий сайтидаги электрон аккредитация тизими орқали VI Бутунжаҳон кўчманчилар ўйинларининг спорт дастурини ўтказиш қоидалари талабларига мувофиқ қабул қилинган.
Иштирок этиш учун Австралия, Озарбайжон, Арманистон, Аргентина, Бангладеш, Баҳрайн, Грузия, Ҳиндистон, Индонезия, Эрон, Испания, Қозоғистон, Мўғулистон, Польша, Россия, АҚШ, Ўзбекистон ва бошқа давлатлардан аризалар келиб тушган. Таъкидлаш жоизки, ташкилий қўмита дастлаб 100 та давлатга расмий таклифнома юборган.
VI Бутунжаҳон кўчманчилар ўйинлари қоидаларига мувофиқ, мусобақалар дастурига спортнинг 42 тури киритилган.
31 августда спорт делегациялари VI Бутунжаҳон кўчманчилар ўйинларининг тантанали очилиш маросими доирасида давлатлар парадида иштирок этади. Жамоалар ушбу тадбирда ягона миллий либосда қатнашиши керак.
Эслатиб ўтамиз, 31 августда Бишкекдаги янги стадионда VI Бутунжаҳон кўчманчилар ўйинларининг тантанали очилиш маросими бўлиб ўтади.
Ўйинларнинг асосий спорт, маданий ва илмий дастури эса 2-6 сентябрь кунлари Иссиқкўл вилоятининг Чўлпон-Ота шаҳри ва Қирчин дарасида давом этади.
Аввалроқ Қирғизистон VI Бутунжаҳон кўчманчилар ўйинларига бағишланган видеороликни тақдим этгани ҳақида хабар берган эдик.
Шунингдек, 2026 йилги Бутунжаҳон кўчманчилар ўйинларининг талисмани сифатида қор қоплони танлангани хабар қилинган эди. Унга Батай номи берилган.