«Freedom 250 Grand Prix» пойгаси узунлиги 1,7 мил бўлган, етти бурилишли трассада 147 айланадан иборат бўлди. Умумий масофа 250 милни ташкил этди. Маршрут Капитолий ва Вашингтон монументи каби пойтахтнинг машҳур диққатга сазовор жойлари яқинидан ўтди.
Пойга олдидан Вашингтонда хавфсизлик чоралари кучайтирилиб, шаҳар марказидаги бир нечта кўча ва кварталлар ёпилди. АҚШ президенти Дональд Трамп яшил байроқ билан пойгани бошлаб берди. Маррага яқин эса транспорт вазири Шон Даффи байроқли ишора орқали ҳаракатни очди.
Пойгага қадар Дональд Трамп президентнинг зирҳланган автомобилида трасса бўйлаб фахрий айланишни амалга ошириб, жамоатчилик эътиборини тортди.
Пойгада Флорида штатида туғилган Кайл Кирквуд ғолиб бўлди. У «Andretti Global» жамоаси сафида иштирок этиб, Миллий архив биноси яқинида чемпионат пешқадами Алекс Палоуни ортда қолдирди. Кирквуд пойга охирига қадар пешқадамликни сақлаб қолди.
Ташкилотчилар маълумотига кўра, тадбирга тахминан 140 минг киши ташриф буюрган. Пойга Вашингтонни тарғиб этиш ва шаҳар иқтисодиётини ривожлантиришга ҳисса қўшадиган йирик тадбир сифатида тақдим этилди.
Қайд этиш жоизки, Конгресс дастлаб Капитолий атрофидан ўтадиган маршрутни маъқулламаган. Кейинчалик Дональд Трамп фармони билан пойга йўналиши ўзгартирилди.
Пойга ҳомийлари қаторида «Boeing», «Starlink», «Delta», «Amazon» ва «Shell» компаниялари бор. Уларнинг айримлари АҚШ федерал ҳукумати билан боғлиқ йирик тижорий манфаатларга эга.
Бу - Дональд Трампнинг АҚШнинг 250 йиллигига бағишланган юбилей тадбирлари доирасидаги иккинчи йирик спорт тадбири бўлди. Бундан аввал Оқ уй ҳудудида UFC жанги ташкил этилган эди.
Эслатиб ўтамиз, аввалроқ Оқ уй олдида UFC турнири аренаси қурилиши бошлангани ҳақида хабар берган эдик.