Ўзбекистонлик боксчи Бектемир Мелиқўзиевнинг жанги тасдиқланди

TASHKENT. Kazinform - Профессионал бокснинг супер ўрта вазн тоифасида фаолият юритувчи ўзбекистонлик чарм қўлқоп устаси Бектемир Мелиқўзиев рингга қайтмоқда, деб хабар беради Kazinform агентлиги ЎР профессионал бокс федерациясига таяниб.

У 30 май куни Лас-Вегас шаҳридаги Virgin Hotels мажмуасида ташкил этиладиган профессионал бокс оқшомида иштирок этади. 29 яшар Мелиқўзиевга ўша куни америкалик Дарьюс Фулгхэм рақиблик қилади. Жанг супер ўрта вазн тоифасида, WBA Элиминатор мақомида ўтказилади. Ушбу тўқнашув ғолиби кейинги жангини айнан чемпионлик камари учун ўтказади. Мелиқўзиев айни дамда ушбу ташкилот рейтингида учинчи ўринни эгаллаб турган бўлса, Фулгхэм тўртинчи поғонада бормоқда.

Супер ўрта вазнда мексикалик Сауль Альварес WBA Super камари соҳиби бўлса, Калеб Плант вақтинчалик камарга эгалик қилади. Шунингдек, Увель Эрнандес WBA Gold чемпиони ҳисобланади.

Маълумот учун, Бектемир Мелиқўзиев фаолияти давомида 16 та жанг ўтказиб, 15 ғалаба (10 КО) ва 1 та мағлубият қайд этган. Дарьюс ҳисобида эса 14 та жангда қўлга киритилган 14 та ғалаба (12 КО) бор.

Эслатиб ўтамиз, аввалроқ ўзбекистонлик Руслан Абдуллаев АҚШда ғалабага эришгани ҳақида хабар берган эдик.