Ўзбекистон Сенати матбуот хизмати хабарига кўра, парламент палаталарининг бир-бирини такрорлайдиган ваколатларига аниқлик киритилди.
Энди сенаторларнинг умумий сони 100 тадан 65 тага қисқартирилади.
Бунда ҳар бир маъмурий ҳудуддан 4 нафар сенатор сайланади, қолган 9 нафар депутат эса президент томонидан тайинланади.
Шунингдек, Қонунчилик палатаси спикерининг ўринбосарлари сони 7 нафардан 2 нафарга қисқартирилади.
Шу билан бирга, улар ўз вазифаларини бажаришлари даврида фракция таркибига кирмайди ва сиёсий партияга аъзоликни тўхтатади.
Бундан ташқари, Қонунчилик палатаси ва Сенатга ўз-ўзини тарқатиш ҳуқуқи берилган.
Бунда Қонунчилик палатасига янги сайлов 2 ой ичида, Сенатнинг янги таркиби эса бир ой муддатда ташкил этилиши керак.
“Қонуннинг Сенат таркиби ва қўмиталарнинг номларини, шунингдек, Қонунчилик палатаси спикери ўринбосарларининг сони ва мақомини белгиловчи қоидалари 2024 йилда, яъни навбатдаги чақирилган Олий Мажлис палаталари фаолияти бошланган пайтда амалга оширилиши режалаштирилган”, — дейилади Сенат матбуот хизмати хабарида.
Муаллиф: Алихан Асқар