Ўзбекистон Республикаси Миллий статистика қўмитаси маълумотларига кўра, 2021 йилда мамлакатда 305,2 мингта никоҳ қайд этилган бўлса, 2022 йилда бу кўрсаткич 296,7 мингтани, 2023 йилда 283,8 мингтани, 2024 йилда 271,8 мингтани ва 2025 йилда 267,1 мингтани ташкил этган.
2026 йилнинг дастлабки олти ойида мамлакатда 92,3 мингта никоҳ иттифоқи тузилган.
Ушбу даврдаги энг кўп никоҳ 2018 йилда қайд этилган бўлиб, уларнинг сони 311,4 мингтани ташкил этган.
Энг паст кўрсаткич эса 2000 йилда кузатилган. Ўшанда Ўзбекистонда 168,9 мингта никоҳ рўйхатга олинган.
Аввалроқ Оила ва гендер илмий-тадқиқот институти Ўзбекистонда никоҳлар сони камайишининг асосий омилларини аниқлаш мақсадида тадқиқот ўтказган эди. Унда демографик ўзгаришлар, аёлларнинг таълим олиш ва касбий фаолиятда муваффақият қозонишга интилиши, иқтисодий қийинчиликлар, ажримлар сонининг ортиши, меҳнат миграцияси ҳамда ёшлар турмуш тарзининг ўзгариши асосий омиллар сифатида кўрсатилган.
Эслатиб ўтамиз, ёзда Ўзбекистонда аҳолини рўйхатга олишнинг дастлабки натижалари эълон қилинган эди.