Туркияда зилзила қурбонлари сони 39,6 мингдан ошди

ANKARA. ANADOLY- Kazinform – Туркия жанубида содир бўлган даҳшатли зилзила қурбонлари сони 39 672 нафарга етди. Бу ҳақда CNN Türk телеканалида мамлакат Ички ишлар вазирлиги раҳбари Сулаймон Сойлу маълум қилди, дея хабар беради Kazinform Анадолу агентлигига таяниб.

Унинг сўзларига кўра, табиий офат пайтида 20 мингдан ортиқ қулаган бинолар ўрнида қидирув-қутқарув ишлари олиб борилган. Вазирнинг айтишича, қидирув-қутқарув ишларининг аксарият қисми якунланган.

6 феврал куни Қаҳраманмарашда 7 баллдан кучли икки марта зилзила содир бўлди. Зилзила мамлакатнинг 10 вилоятида, шунингдек, қўшни давлатлар, жумладан Сурияда ҳам сезилган.

Президент Режеп Таййип Эрдоған Туркияда етти кунлик миллий мотам эълон қилди. Давлат раҳбари Қасим-Жомарт Тоқаев Туркия президенти Режеп Таййип Эрдоғанга ҳамдардлик телеграммаси йўллади.

Қозоғистон Туркияга фавқулодда ёрдам учун бир миллион доллар ажратди. Махсус рейс билан 101 нафар шифокор ва қутқарувчилардан иборат бригада жўнатилди. Қозоғистонлик қутқарувчилар вайроналар остидан 7 кишини олиб чиқди.

Шунингдек, Қозоғистон табиий офат ҳудудига 160 тоннадан ортиқ гуманитар ёрдам ва 28 та генератор жўнатди.

Қозоғистонликлар Туркиядаги зилзила қурбонлари учун 3 миллион 600 минг АҚШ долларидан ортиқ маблағ йиғди.

Фото: aa.com.tr

Foto: aa.com.tr