Туркия Маданият ва туризм вазири Меҳмет Нури Эрсой мамлакатнинг туристик салоҳиятини янада ривожлантириш зарурлигини таъкидлади.
Унинг айтишича, Туркиянинг ҳар бир ҳудуди ўзига хос табиий ва маданий қадриятларга эга. Бой тарихий мерос, табиий диққатга сазовор жойлар ва меҳмондўстлик уйғунлиги мамлакатга дунёнинг турли бурчакларидан сайёҳларни жалб этиш имконини беради.
“Биз табиий ва маданий меросимизни асраб-авайлаш ва уни келажак авлодларга етказиш билан бирга, туризмни Туркиянинг барча тўрт фасли ва 81 та вилоятига кенгайтириш йўналишида иш олиб бормоқдамиз”, — деди туркиялик вазир.
Эрсой табиий ва маданий меросни асраш ҳамда уни келажак авлодларга етказиш давлатнинг туристик сиёсатидаги асосий йўналишлардан бири эканини таъкидлади. Шунингдек, унинг айтишича, туристик фаоллик айрим ҳудудлар ва йилнинг муайян даврлари билан чекланиб қолмаслиги керак.
Аввалроқ Туркиянинг жорий йил иккинчи чорагида туризмдан олган даромади ўтган йилнинг шу даврига нисбатан 2,6 фоизга камайгани ҳақида хабар берилган эди.