Туркия соғлиқни сақлаш вазири Кемал Мемишоғлу тамаки маҳсулотларини сотишда шахсни тасдиқловчи ҳужжатни мажбурий текшириш ташаббусига нисбатан билдирилган танқидларга жавоб берди.
Унинг таъкидлашича, янги чоранинг асосий мақсади — 18 ёшга тўлмаган шахсларга тамаки маҳсулотлари сотилишининг олдини олиш ва ўсмирларни никотиннинг зарарли таъсиридан ҳимоя қилиш.
Вазир ҳукумат фуқароларнинг шахсий маълумотлар махфийлиги борасидаги хавотирларини тушунишини қайд этди. Шу муносабат билан шахсий маълумотларнинг ҳимоя қилинишини ва фойдаланишда қулайликни таъминлайдиган электрон тизимларни ҳам ўз ичига олган ҳолда, шахснинг ёшини текширишнинг турли вариантлари кўриб чиқилмоқда.
“Шу билан бирга, мамлакат ҳукумати тамаки чекмайдиган фуқароларнинг тоза ҳаводан нафас олиш ҳуқуқини ҳимоя қилиш ва жамоат жойларида тамаки чекиш билан боғлиқ масалаларни ҳал этиш чораларини ҳам кўрмоқда”, — деди Мемишоғлу.
Аввалроқ вазир тамаки маҳсулотларини сотишда шахсни тасдиқловчи ҳужжатларни мажбурий текширишни ҳамда белгиланган чекловларга риоя этилишини назорат қилишни кучайтиришни назарда тутувчи қонун лойиҳаси ишлаб чиқилаётганини маълум қилган эди.
Кўриб чиқилаётган чоралар қаторида истироҳат боғлари ва хиёбонларда тамаки чекишга қўшимча чекловлар жорий этиш, шунингдек, тамаки маҳсулотларининг аҳоли учун мавжудлигини камайтириш ҳам бор.