Нонтхабури шаҳридаги MCC Hall кўргазма марказида бўлиб ўтган танлов финалида Дилҳан Диврикли Нигерия ва Филиппин вакиллари билан бирга энг кучли уч иштирокчи қаторига кирди.
Танлов натижаларига кўра, туркиялик иштирокчи бош совринни қўлга киритди. Иккинчи ўринни нигериялик Бетел Мбамара, учинчи ўринни эса филиппинлик Эм Жей Ордильяно эгаллади.
Танловда дунёнинг турли мамлакатларидан келган номзодлар иштирок этди. Тахминан ўн кун давомида қатнашчилар тайёргарлик босқичидан ўтиб, турли тадбирлар ва тақдимотларда қатнашдилар. Финалда эса ҳакамлар ҳайъати олдида ўз маҳоратларини намойиш этдилар.
Дилҳан Диврикли бунга қадар Туркияда ўтказилган моделлик танловларида ҳам муваффақиятларга эришган. Унинг оиласи Афьонқараҳисор вилоятидан бўлса-да, ўзи Бельгияда яшайди. Дилҳан тўртта тилда сўзлаша олади. Моделлик фаолиятидан ташқари, у актёрлик санъатига ҳам қизиқади ва келгусида бу йўналишда ривожланишни режалаштирмоқда.