Туркия инфляция секинлашгани боис асосий ставкани пасайтирди

ASTANA. Kazinform – Туркия Марказий банки пайшанба куни асосий фоиз ставкасини 300 базис пунктга камайтириб, 43% даражасига туширди. Бу қарор мамлакатда инфляция пасайиши сабабли пул-кредит сиёсатини юмшатиш жараёни қайта бошланганидан далолат беради. Бу ҳақда Kazinform агентлигининг Туркиядаги мухбири хабар берди.

Пул-кредит сиёсати бўйича қўмита йиғилиши ортидан Марказий банк бир кунлик кредит олиш ва бериш ставкалари мос равишда 49%дан 46%га ҳамда 44,5%дан 41,5%га туширилганини маълум қилди.

Расмий статистикага кўра, июнь ойида йиллик инфляция 35,05% ни ташкил этди. Солиштириш учун айтганда, ўтган йилнинг май ойида бу кўрсаткич 75%гача етган эди.

Марказий банк июнь ойида инфляцион босим барқарор бўлганини таъкидлади, бироқ июль ойида мавсумий омиллар сабабли вақтинча ўсиш кузатилиши мумкинлигини қайд этди. Шунга қарамасдан, иқтисодий талабнинг сусайиши дефляцион таъсирини сақлаб турибди.

Бу қарор бозор кутилмаларига нисбатан анча кескин бўлди. Мутахассислар асосан ставка 250 базис пунктгача туширилади, деб тахмин қилган, аммо башоратлар 250 дан 350 пунктгача бўлган диапазонда бўлган эди.

Қарор эълон қилинганидан сўнг турк лираси барқарорлигини сақлаб қолди – АҚШ долларига нисбатан курси тахминан 40,48 атрофида сақланди.

Марказий банк келгуси қарорларга «эҳтиёткорлик билан ёндашишини» ва «ҳар бир йиғилишда алоҳида қарор қабул қилинишини» таъкидлади.

Шунингдек, банк инфляция бўйича ўрта муддатли мақсад – 5% даражасида қолишини тасдиқлади. Май ойида эълон қилинган прогнозга кўра, 2025 йил охиригача инфляция 24%гача пасайиши кутилмоқда.

Таҳлилчиларнинг баҳолашича, фоиз ставкаларини пасайтириш давом этиши мумкин. 2025 йил охирига келиб ставка 36% даражасига тушиши эҳтимолдан холи эмас, юмшатиш даври эса камида 2026 йилнинг учинчи чорагигача давом этади, деб тахмин қилинмоқда.