Йиғилишда ёзги спорт турлари бўйича миллий спорт федерациялари раҳбарлари иштирок этди. Учрашувда миллий терма жамоаларнинг ҳозирги тайёргарлик даражаси, спортчиларнинг халқаро мусобақалардаги натижалари, тасдиқланган режаларнинг бажарилиши, шунингдек, тиббий, моддий-техник ва ташкилий таъминот масалалари кўриб чиқилди.
“XX ёзги Осиё ўйинларида 45 мамлакатдан қарийб 15 минг нафар спортчи иштирок этиши режалаштирилган. Мусобақалар давомида 469 та медаллар жамланмаси учун баҳслар ўтказилади. Қозоғистон терма жамоаси спортнинг 35 тури бўйича иштирок этишни режалаштиряпти”, — дейилади хабарда.
Йил бошидан бери қозоғистонлик спортчилар спортнинг 68 тури бўйича 282 та халқаро мусобақада иштирок этди. Улар орасида 26 та жаҳон чемпионати, Жаҳон кубогининг 71 та босқичи, 37 та Осиё чемпионати ва 148 та халқаро турнир бор. Шунингдек, Спортни ривожлантириш дирекцияси томонидан 226 та ўқув-машғулот йиғини ташкил этилди. Мураббийлар таркибини кучайтириш мақсадида спортнинг 13 тури бўйича 11 мамлакатдан 24 нафар хорижлик мутахассис жалб этилди.
Йиғилиш якунида қабул қилинган мажбуриятларнинг бажарилишини таъминлаш, миллий терма жамоалар тайёргарлигини назорат қилишни кучайтириш ва юзага келган масалаларни тезкор ҳал этиш зарурлиги таъкидланди. Вазирлик Миллий Олимпия қўмитаси ва спорт федерациялари билан ҳамкорликда Қозоғистон терма жамоасининг XX ёзги Осиё ўйинларида муваффақиятли иштирок этиши учун зарур барча шароитларни яратиш борасидаги ишларни давом эттиради.
Учрашув доирасида федерация раҳбарлари Астанадаги Қозоқ миллий спорт университетининг инфратузилмаси билан ҳам танишдилар. Янги университет Марказий Осиёда спорт илми ва мутахассислар тайёрлаш соҳасидаги энг йирик таълим лойиҳаларидан бирига айланди. Бу ерда мураббийлик фаолияти, спорт илми, спорт тиббиёти ва реабилитация, менежмент, спорт журналистикаси, аналитика ҳамда бошқа йўналишлар бўйича мутахассислар тайёрлаш учун замонавий шароитлар яратилган.