Аввалроқ, август ойида мамлакатнинг AVROTROS телерадиокомпанияси иштирокчилар рўйхатида Исроил борлиги сабабли танловда қатнашишдан бош тортган эди.
NPOнинг танловда қайта иштирок этиш ташаббуси ташкилот ичида ҳам танқидга учради. Тахминан 400 нафар ходим қарорни қайта кўриб чиқишни талаб қилиб, очиқ хатга имзо чекди. Охир-оқибат, NPO бош директори Йет де Ранитс танловда иштирок этишга тайёр телерадиокомпанияни топишнинг иложи бўлмаганини маълум қилди.
“Дастлаб танловга қайтишни қўллаб-қувватлаш учун етарлича асос бор, деб ўйлагандик. Бироқ ҳозир «Евровидение-2027»да иштирок этиш учун ҳали эрта экани яққол кўринмоқда. Жамиятда қизғин мунозаралар кечаётгани ва қарашлар бир-бирига зид келаётгани сабабли, ҳозирча бир қадам ортга чекинишни маъқул кўрдик”, — деди де Ранитс.
Шунга қарамай, NPO танловни эфирга узатиш ҳуқуқини сақлаб қолади.
«Евровидение» директори Мартин Грин Нидерландиянинг иштирок этишдан бош тортганидан афсусда эканини билдирган бўлса-да, мамлакатнинг қарорини ҳурмат қилишини таъкидлади.
“Ҳозир танловга нисбатан фикрлар мамлакатлар ичида ҳам, улар ўртасида ҳам иккига бўлинаётганини тушунамиз. Жамоатчилик телерадиокомпаниялари ўз аудиториясининг фикрига қулоқ тутишга мажбур. Шунинг учун ҳамкорларимизнинг жамоатчилик билан мулоқот олиб борган ҳолда қарор қабул қилиши ўринлидир”, — деди у.
Гриннинг таъкидлашича, бирлик руҳи танловнинг асосий мазмуни бўлиб қолмоқда. Ташкилотчилар Нидерландия вақти келиб танловга қайтади, деган умидда.
Нидерландия - «Евровидение-2027»да иштирок этишдан бош тортган ягона мамлакат эмас. Аввалроқ Ирландия ҳам танловга бормаслигини маълум қилган, Испаниянинг RTVE телерадиокомпанияси раҳбарияти эса бойкот эълон қилиш ғоясини очиқ қўллаб-қувватлаган. Чехия ҳам танловда иштирок этмайди, бироқ бунга бошқа сабаб — харажатларни қисқартириш зарурати асос бўлган.
Эслатиб ўтамиз, ўтган йили Испания, Нидерландия, Ирландия, Исландия ва Словения Ғазо секторидаги ҳарбий ҳаракатлар билан боғлиқ вазият сабабли ташкилотчилар Исроилни танловдан четлатишдан бош тортганидан сўнг «Евровидение»ни бойкот қилган эди. Ўшанда Испаниянинг RTVE телерадиокомпанияси танлов раҳбариятини «сиёсий босим» ўтказишда айблаган бўлса, Ирландиянинг RTÉ телеканали гуманитар инқироз шароитида Исроилнинг иштирокини «йўл қўйиб бўлмайдиган ҳолат» деб атаган. Словениянинг RTVSLO телеканали эса танлов саҳнасига чиқиш тинчлик ва тенглик қадриятларига зид эканини билдирган.
Танлов атрофидаги сиёсий инқироз унинг оммабоплигига ҳам таъсир кўрсатмоқда. Ўтган йили «Евровидение»ни 131 миллион томошабин кузатган. Бу аввалги йилга нисбатан 35 миллион нафарга кам.
2027 йилги «Евровидение» финали 15 майда Болгариянинг Бургас шаҳрида бўлиб ўтади. Болгария танловни ўтказиш ҳуқуқини Венада Дара ғолиб бўлганидан кейин қўлга киритган.