6 август оқшомига келиб, октябрь ойида етказиб бериладиган Brent нефтининг фьючерслари 1,04% га ўсиб, 1 баррель учун 80,28 долларни ташкил этди. АҚШнинг WTI нефти 0,81% га ўсиб, 1 баррель учун 75,83 долларни ташкил этди.
Reuters маълумотларига кўра, инвесторлар Эрон ва Ўмон ўртасидаги музокаралар ҳақидаги маълумотларни эҳтиёткорлик билан кузатмоқдалар. Бозор иштирокчилари ҳар қандай потенциал келишувлар қисқа муддатда геосиёсий кескинликни юмшата олишига шубҳа қилишмоқда. Ҳозиргача эришилган келишувларнинг аксарияти узоқ давом этмади.
Нефть нархларининг ошишига таъминотга таҳдидлар ҳам таъсир кўрсатмоқда. Агентлик маълумотларига кўра, Ямандаги хусийлар Қизил денгиз ва Аден кўрфазида Саудия Арабистони танкерларига ҳужумлар уюштиришини маълум қилишди. Эрон АҚШнинг янги ҳужумлари бўлган тақдирда Форс кўрфази давлатларининг энергетика инфратузилмасига қарши жавоб чоралари кўриши мумкинлиги ҳақида огоҳлантирди.
Шу билан бирга, Саудия Арабистонининг сентябрь ойида осиёлик харидорлар учун Arab Light нефтининг расмий сотиш нархини бироз пасайтириши ҳам бозорга таъсир кўрсатди. Бироқ, мутахассисларнинг фикрича, геосиёсий вазиятнинг кескинлашиши ҳозирча нефть нархларини юқори даражада ушлаб туришга ёрдам бермоқда.
Эслатиб ўтамиз, жаҳон биржаларида нефть нархи пасайгани ҳақида хабар берган эдик.