Клиник синовларнинг кечки босқичида олинган ижобий натижалар COVID-19 пандемиясидан сўнг маҳсулотлар қаторини кенгайтиришга ҳаракат қилаётган Moderna компанияси учун муҳим ютуқ бўлди. Эслатиб ўтамиз, айнан коронавирусга қарши мРНК вакцинаси компания бизнесининг жадал ўсишига сабаб бўлган эди.
Персоналлаштирилган вакцина ҳар бир бемор учун алоҳида ишлаб чиқилади. У иммун тизимига ўсма ҳужайраларини уларга хос бўлган мутациялар орқали таниб олиш ва уларга ҳужум қилишда ёрдам беради.
Тадқиқотда вакцина Merck компаниясининг Keytruda препарати билан биргаликда қўлланилган. Қайталаниш хавфи юқори бўлган меланомани жарроҳлик йўли билан олиб ташлаш операциясини бошдан кечирган беморларда ушбу комбинация фақат Keytruda билан даволашга нисбатан яхшироқ натижаларни кўрсатган.
Қайд этилишича, ушбу ишланманинг муваффақияти саратоннинг бошқа турларини даволаш учун шу каби препаратларни яратишга йўл очиши мумкин. Moderna, Merck ва бошқа компаниялар ушбу ёндашувни ўпка, кўкрак бези ва ошқозон ости бези ўсмаларини даволашда ўрганмоқда.