Малайзия Ўзбекистондаги конларни ўзлаштиришдан манфаатдор
TASHKENT. Kazinform – Малайзияда расмий ташриф билан бўлган Ўзбекистон Президенти Шавкат Мирзиёев Petronas корпорацияси президенти Муҳаммад Тауфик билан учрашди, деб хабар беради Kazinform агентлигининг Ўзбекистондаги муҳбири Алихан Асқар.
Томонлар учрашувида Ўзбекистон ва Малайзия ўртасидаги нефть-газ, кимё ва энергетика соҳаларидаги ҳамкорлик масалалари муҳокама қилинди.
«Геологик қидирув ишларини олиб бориш ва истиқболли конларни ўзлаштириш, карбонат ангидрид газининг атроф-муҳитга етказадиган зарарини камайтириш бўйича илғор технологияларни жорий этиш масалалари ҳамкорликнинг устувор йўналишлари этиб белгиланди. Шунингдек, томонлар Petronas университети негизида юқори малакали кадрлар тайёрлашга келишиб олдилар”, – дейилади Ўзбекистон Президенти матбуот хизмати хабарида.
Ўзбекистон жорий йилда газ қазиб олишни кўпайтириш мақсадида 15 та участкада геология-қидирув ишларини олиб боради.
Бундан ташқари, аввалроқ Хитойнинг Ўзбекистондаги элчиси Пекин Марказий Осиё давлатлари билан саноат кооперациясини ривожлантириш ниятида эканини маълум қилганди.