Ливан парламенти сешанба куни ўлим жазосини бекор қилиш ва уни умрбод қамоқ жазоси билан алмаштириш учун овоз берди. Аввалги барча ўлим жазолари умрбод қамоқ жазоси билан алмаштирилади, деб хабар беради Ливаннинг NNA агентлиги.
Қонун лойиҳаси 128 ўринли парламентнинг кўпчилик овози билан қўллаб-қувватланди. Унга шиа “Ҳизбуллоҳ” ҳаракатининг парламент блоки қарши чиқди. Ҳужжат қонунда белгиланган кейинги процедуралардан ўтиши керак, жумладан, Ливан президенти Жозеф Ауннинг имзолаши лозим.
Агар қонун ниҳоят кучга кирса, Ливан Яқин Шарқда ўлим жазосини расман бекор қилган биринчи мамлакатга айланади.
Мамлакат 20 йилдан ортиқ вақт давомида ўлим жазосини амалда қўлламаган. Охирги қатл 2004 йил январь ойида бўлган. Бироқ, судлар қотиллик, хоинлик, жосуслик, террористик характердаги айрим жиноятлар ва давлат хавфсизлигига қарши жиноятлар учун максимал жазони қўллашда давом этмоқда.
Ливан адлия вазири Адел Нассар парламент қарорини "тарихий қадам" деб атади. Европа Иттифоқи ҳам ўлим жазосининг бекор қилинишини олқишлаб, Ливан минтақадаги бошқа мамлакатлар учун муҳим ўрнак бўлаётганини айтди.
— Бугунги қадам, 20 йилдан ортиқ қатл қилинмаганидан сўнг, ўлим жазосини вақтинчалик мораторийдан яшаш ҳуқуқини доимий ҳуқуқий ҳимоя қилишга ўтказади, — деди Халқаро Амнистия ташкилотининг Яқин Шарқ ва Шимолий Африка бўйича минтақавий директори Ҳеба Мораеф.
Бу қарор парламент айрим судланган маҳбусларнинг жазосини қисқартириш ёки ҳатто уларни озод қилиш имконини берадиган кенг қамровли амнистия тўғрисидаги алоҳида қонун лойиҳасини муҳокама қилаётган бир пайтда қабул қилинди.
Оммавий ахборот воситалари хабарларига кўра, ушбу ташаббус, хусусан, экстремистик гуруҳлар ҳужумларида ҳалок бўлган ливанлик ҳарбий хизматчиларнинг қариндошлари орасида мунозараларга сабаб бўлди.
Эслатиб ўтамиз, Шимолий Кореяда Жанубий Корея контентини томоша қилганлик учун ўлим жазоси кўпайди.