400 саҳифалик илмий асар аввалроқ Алмати ва Астанада китобхонларга тақдим этилган эди. Китоб қозоқ, турк, рус ва инглиз тилларида нашр этилган. Асарнинг асосини қурултойнинг келиб чиқиш тарихи ва унинг минтақа сиёсий ҳаётидаги ролини ёритиб берувчи тарихий қўлёзмалар ташкил этади.
Китобнинг турк тилидаги нусхаси Туркиядаги ҳукмрон Адолат ва тараққиёт партиясининг (AK Parti) Туркий давлатлар билан алоқалар бўйича бошқармаси кўмагида нашр этилди.
Тадбирда дипломатик корпус вакиллари, турк олимлари ва Анқарада истиқомат қилаётган қозоғистонликлар иштирок этди. Тақдимотдан сўнг қурултойнинг тарихий аҳамияти ва унинг ҳозирги сиёсий жараёнлардаги долзарблиги муҳокама қилинган экспертлар баҳс-мунозараси бўлиб ўтди.
Туркия Адолат ва тараққиёт партияси раисининг ўринбосари Кюршад Зорлу қурултой қадимги туркий тарих ва давлат бошқаруви анъаналарида муҳим ўрин тутишини таъкидлади.
Унинг айтишича, Қозоғистон парламенти номининг Қурултой деб ўзгартирилиши тарихий илдизларга қайтишни англатади ва сиёсий институтлар ўртасидаги изчилликни намоён этади.
Китоб муаллифларидан бири, жамоат арбоби Омархан Оксикбаев ҳам ушбу анъанани қайта тиклашнинг аҳамиятига тўхталди. У Қозоғистон Президенти Қасим-Жомарт Тоқаевнинг 2022 йилда Миллий қурултойни ташкил этиш ташаббусини ҳамда ушбу институтнинг кейинчалик парламент даражасигача ривожланганини таъкидлади.
Муаллифлар тарихий манбаларни ўрганишни давом эттириш ва янги илмий асарлар тайёрлашни режалаштирмоқда. Ҳозирда китоб Қозоғистоннинг бир қатор олий таълим муассасаларида тақдим этилмоқда. Келгусида Озарбайжон ва Европа мамлакатларида ҳам тақдимотлар ўтказиш имконияти кўриб чиқилмоқда.
Муаллифларнинг фикрича, ушбу лойиҳа халқаро аудиториянинг қозоқ давлатчилиги тарихи ва жамоатчилик вакиллиги анъаналарининг ривожланишига бўлган қизиқишини оширишга хизмат қилади.
Муаллиф: Ақжигит Чукубаев