ҚР Президенти ва Антониу Гутерриш БМТнинг Алматидаги минтақавий марказида нутқ сўзлади

ALMATY. Kazinform – Қасим-Жомарт Тоқаев ушбу муҳим тадбирда иштирок этгани учун БМТ Бош котиби Антониу Гутерришга миннатдорлик билдирди. Президент бугунги тадбир нафақат Қозоғистон, балки Бирлашган Миллатлар Ташкилоти учун ҳам муҳим аҳамиятга эга эканини айтди. Бу ҳақда Ақорда хабар берди.

Ушбу воқеа бутунжаҳон ҳамжамиятига халқаро саҳнада тобора муҳим ўрин эгаллаб бораётган Марказий Осиёнинг аҳамиятини яққол намоён этди.

Давлат раҳбарининг таъкидлашича, имзоланган келишув орқали Марказий Осиё ва Афғонистон учун барқарор ривожланиш мақсадларига йўналтирилган минтақавий марказни ташкил этиш расман тасдиқланди. Бу эса Қозоғистон ва БМТ ўртасидаги узоқ муддатли ва самарали ҳамкорликнинг муҳим босқичидир.

“Геосиёсий беқарорлик ва тўқнашувлар авж олган, иқлим ўзгариши мураккаблашган ҳамда озиқ-овқат хавфсизлиги таҳдид остида бўлган бир пайтда, Бирлашган Миллатлар Ташкилоти жаҳонда хавфсизлик ва барқарорликни таъминлашда асосий ролни ўйнаши лозим. Қозоғистон учун БМТ халқаро тартиботнинг ягона ва асосий таянчи бўлиб қолади. Мамлакатимиз Ташкилот аъзоси бўлган 33 йилдан бери жаҳон ҳамжамиятининг масъулиятли, фаол ва тинчликсевар аъзоси сифатида ўзини кўрсатиб келмоқда”, – деди Президент.

Қасим-Жомарт Тоқаевнинг фикрича, Алмати шаҳрида БМТ минтақавий марказининг очилиши минтақанинг стратегик аҳамияти ортиб бораётганини англатади.

“Бугунги кунда Марказий Осиё мустаҳкам бирликка эга, яхши қўшничилик ва умумий тараққиёт тамойилларига содиқ ҳудуд сифатида намоён бўлмоқда. Минтақа мамлакатлари сиёсий ва ижтимоий ислоҳотлар ўтказиб, иқтисодиётни диверсификация қилиш бўйича қатъий чоралар кўрмоқда. Инсон капиталига инвестиция киритиб, инклюзив институтлар барпо этишга ҳаракат қилмоқда. Биз халқаро муҳим муаммоларни ҳал этишда фаол иштирок этувчи, музокарачи ҳудуд сифатида Марказий Осиёнинг салоҳиятини рўёбга чиқариш ва жаҳон майдонида конструктив ва келажакка қаратилган кун тартибини илгари суришга интиламиз. Шу нуқтаи назардан, Алмати шаҳрида БМТнинг минтақавий марказини очиш ўз вақтидаги ва стратегик жиҳатдан муҳим қадам бўлди”, – деди Давлат раҳбари.

Президентнинг сўзларига кўра, марказ минтақа мамлакатлари иқтисодиётининг барқарорлиги ва ўсишини таъминлашга, инновацияларни ривожлантиришга ҳамда ҳамкорликни чуқурлаштиришга қаратилган мувофиқлаштирилган ҳаракатлар катализаторига айланади.

“Ушбу Марказ ваколат ва функциялари билан минтақадаги ёки ундан ташқарисидаги бошқа ташкилотларнинг фаолиятини такрорламайди. Аксинча, у минтақа аҳолисининг реал эҳтиёжларини инобатга олган ҳолда амалга оширилаётган чора-тадбирларни тўлдириб, уларнинг мазмун ва самарадорлигини оширади. Орал денгизи экологик инқирози ва Каспий денгизи суюлишидек минтақамизга хос муаммолар барчага маълум. Ушбу муаммоларга самарали ечим топиш учун минтақавий ҳамкорликни мустаҳкамлаш ва бу жараёнга БМТни фаол жалб этиш лозим. Шу муносабат билан Қозоғистон келаси йил апрель ойида Астанада БМТ агентликлари билан ҳамкорликда Минтақавий экологик саммит ўтказади”, – деди Президент.

Эслатиб ўтамиз, Президент Қасим-Жомарт Тоқаев ва Бош котиб Антониу Гутерриш Алмати шаҳридаги БМТ минтақавий марказига ташриф буюрди.