Туркиянинг Анқара шаҳрида Туркий дунё санъат университетлари иттифоқининг VI йиғилиши доирасида халқаро бирлашмага янги аъзоларни қабул қилиш маросими бўлиб ўтди.
Иттифоқ таркибига Қурманғози номидаги Қозоқ миллий консерваторияси ҳамда Куляш Байсейитова номидаги Қозоқ миллий санъат университети қабул қилинди.
Қозоғистон олий таълим муассасалари вакилларига Иттифоққа аъзоликни тасдиқловчи сертификатларни Халқаро туркий маданият ташкилоти (ТУРКСОЙ) Бош котиби Султон Раев ва Иттифоқ раиси, Анқара мусиқа ва тасвирий санъат университети ректори Гулчин Яҳя Качар топширди.
Ҳамкорлик доирасида туркий халқларнинг маданий меросини асраб-авайлаш ва тарғиб қилиш, миллий ижрочилик мактабларини ривожлантириш ҳамда санъат соҳасидаги олий таълим муассасалари ўртасидаги профессионал алоқаларни мустаҳкамлашга алоҳида эътибор қаратилади.
Қозоғистон олий таълим муассасаларининг Иттифоққа аъзо бўлиши таълим ва санъат соҳасидаги халқаро ҳамкорликни ривожлантириш, миллий маданиятни жаҳонга кенг танитишга хизмат қилади.