Қозоғистонда гўшт нархи ошадими

ASTANA. Kazinform - Қозоғистонда гўшт нархи ошиши кутилмаяпти. Бу ҳақда ҚР Қишлоқ хўжалиги вазири ўринбосари Ермек Кенжеханули Сенат йиғилишида маълум қилди, дея хабар беради Kazinform мухбири.

Вазир ўринбосари ўтган йил якунига кўра 1,1 миллион тоннадан ортиқ мол ва қўй гўшти етиштирилгани, бу мамлакат эҳтиёжини тўлиқ қоплаганини таъкидлади.

“Ўтган йил якунларига назар ташлайдиган бўлсак, етиштириш ҳажми қарийб 4 фоизга, жумладан, мол гўшти етиштириш 2 фоиздан кўпроққа ошган. Бу чора-тадбирлар аҳолининг гўштга бўлган эҳтиёжини тўлиқ қондириш имконини беради, шунинг учун ҳам етиштириш ҳисобига гўшт нархини оширувчи омилларни ҳали кўрмадик”, - деди Ермек Кенжеханули.

Унинг сўзларига кўра, гўшт нархининг ошишига Ўзбекистондан талабнинг юқорилиги сабаб бўлган.

"Бироқ биз охирги ҳафтада кузатганимиздек, нарх барқарорлашди ва бошқа омилларни (нархларнинг ошиши - муҳаррир эслатмаси) ҳозирча башорат қилмаяпмиз", - деди у.

Шунингдек, вазир ўринбосари бугунги кунда чорвачилик билан шуғулланувчи фермерларга меҳнат фаолияти учун 5 фоиз ставкада имтиёзли молиялаштириш ажратиш масаласи кўриб чиқилаётганини маълум қилди.

“Бу чора мамлакат учун гўшт етиштиришни янада рағбатлантиради. Ҳозир 1 килограмм мол гўштининг тахминий баҳоси 2700-3000 тенге”, - дея қўшимча қилди Ермек Кенжеханули.