Қозоғистонлик теннисчи АҚШдаги турнирнинг чорак финалига чиқди

ASTANA. Kazinform – Қозоғистонлик спортчи, дунёнинг 338-ракеткаси Дмитрий Попко АҚШда ўтказилаётган Палм-Коуст ITF турнирининг чорак финалига чиқди.

Мусобақанинг 2-ракеткаси сифатида рўйхатдан ўтган қозоғистонлик теннисчи аввалига жаҳон рейтингида 1238-ўринни эгаллаб турган америкалик Александер Разегини мағлуб этди - 6:4, 6:4.

Иккинчи босқичда Попко яна бир америкалик, 781-ўринни эгаллаб турган Феликс Корвинни худди шундай натижа билан ортда қолдирди.

Дмитрий ярим финалга чиқиш учун дунёнинг 821-ракеткаси, АҚШ вакили Аксель Нефве билан куч синашади.

Қозоғистонлик теннисчи бир ҳафта олдин Санрайзда худди шундай баҳсда ғалаба қозонган эди. Унда у А.Нефвени 6:7 (9:11), 7:5, 6:2 ҳисобида мағлуб этди.

Эслатиб ўтамиз, аввалроқ Александр Шевченко Роттердамда сенсация уюштириб, дунёнинг 7-ракеткасини мағлуб этгани ҳақида ёзган эдик.

Елена Рибакина Доҳада АҚШ чемпионати финалчисини мағлуб этиб, ярим финалга йўл олди.