8 мингдан ортиқ инсон қутқарилди
Мамлакат фуқаро муҳофазаси соҳасида 29 мингдан ортиқ мутахассис хизмат қилади. Улар орасида ўт ўчирувчилар, ғаввослар, кинологлар, шифокорлар ва психологлар бор. Ҳар бирининг вазифаси турлича бўлса-да, уларни умумий мақсад — фавқулодда вазиятлар оқибатларини камайтириш ва инсон ҳаётини сақлаб қолиш бирлаштиради.
Йил бошидан буён қутқарувчилар 70 мингдан ортиқ чақирувга чиқиб, 8 мингдан зиёд кишини қутқарди. Яна 9 мингдан ортиқ одам хавфли ҳудудлардан эвакуация қилинди, қарийб 3 минг нафар жабрланувчига тиббий ёрдам кўрсатилди. Мамлакатда ҳар йили 18 мингдан ортиқ табиий ва техноген хусусиятга эга фавқулодда вазиятлар қайд этилади. Уларнинг қарийб 12 мингтаси ёнғинлар ҳиссасига тўғри келади.
Бундай катта иш ҳажми қутқарувчилардан юқори касбий тайёргарлик, тезкор ҳаракат қилиш ва ҳар қандай вазиятга шай туришни талаб этади. Шу боис соҳада мутахассислар малакасини ошириш билан бир қаторда, техник имкониятларни такомиллаштиришга ҳам устувор аҳамият берилмоқда.
Янги техника ва вазифалар
Соҳадаги янгиланишлар хавфларнинг олдини олиш тизимларини такомиллаштириш билан бирга, техник жиҳозланишда ҳам намоён бўлмоқда. Ҳозирда аҳолини фавқулодда вазиятлар ҳақида тезкор хабардор қилишга мўлжалланган Mass Alert тизими жорий этилган.
Бундай тизимлар хавф ҳақидаги маълумотларни ўз вақтида етказиш ва аҳолининг зарур чораларни олдиндан кўришига имкон беради. Техникани янгилаш ишлари ҳам босқичма-босқич амалга оширилмоқда.
“2024-2026 йилларда Фавқулодда вазиятлар вазирлигининг техника парки 1 468 та техника бирлиги билан тўлдирилди. Уларнинг 700 таси ўт ўчириш машиналаридир. Бундан ташқари, 45 та ўт ўчириш депоси ва 16 та қутқарув бўлинмаси қурилди, 350 дан ортиқ объект модернизация қилиниб, таъмирдан чиқарилди”, — дейилади вазирлик маълумотида.
Янгиланишлар авиация соҳасини ҳам қамраб олди. Вазирлик илк бор самолётлар ва бошқа ҳаво кемаларини харид қилиб, авиация паркини 13 та замонавий ҳаво кемаси билан тўлдирди. Улардан қидирув-қутқарув ишларида, табиий ёнғинларни ўчиришда, гуманитар юкларни етказиб беришда ва беморларни тиббий эвакуация қилишда фойдаланилади. Шунингдек, сейсмик кузатув тизимлари янгиланиб, саноат хавфсизлиги чоралари кучайтирилди.