Ўзбекистон Марказий банкининг жисмоний шахсларнинг валюта операциялари бўйича маълумотларига кўра, дунёдаги қарийб 40 та мамлакатда жами 1,4 миллион нафарга яқин ўзбекистонлик меҳнат қилмоқда.
Ўзбекистон фуқароларининг энг кўпи Россияда ишлайди — 834,2 минг киши.
Кейинги ўринларда Европа мамлакатлари — 258 минг, Қозоғистон — 84,4 минг, Туркия — 72,1 минг ва Жанубий Корея — 46,4 минг киши билан қайд этилган.
Жами меҳнат мигрантларининг 398,9 минг нафари ёки 28,6 фоизини аёллар ташкил этади. Ёшларнинг улуши эса 402,1 минг нафар ёки 28,9 фоизга етган.
Шу билан бирга, Ўзбекистондан меҳнат миграцияси географияси аста-секин ўзгармоқда: МДҲ давлатларининг улуши 29 фоизга қисқарган бўлса, Европа минтақаси мамлакатларида ишлаётган фуқаролар сони 42 фоизга, Шарқий Осиёда эса 26 фоизга ошган.
Меҳнат миграциясининг асосий иқтисодий омили Ўзбекистон ва меҳнат мигрантлари бораётган мамлакатлардаги иш ҳақи даражаси ўртасидаги фарқ бўлиб қолмоқда.