Шимолий Қозоғистон вилоятида тижорат сут фермаси фойдаланишга топширилди. Биринчи босқичда 800 бошга мўлжалланган молхона, сут блоки, 550 бош соғилмайдиган ва бузоқли сигирларни сақлаш учун мўлжалланган бинолар, иккита бузоқхона ҳамда омухта ем заводи қурилди. Мажмуа ҳудудида Марказий Осиёдаги энг йирик, 100 бошга мўлжалланган соғиш карусели ўрнатилган. Ҳозирга қадар Германиядан 585 бош наслдор қорамол олиб келинди. Йил охирига қадар яна 660 бош олиб келинади. Лойиҳа доирасида чорва моллари сонини 12 минг бошга етказиш режалаштирилган.
Абай вилоятида кунгабоқар уруғини қайта ишлаш ва ўсимлик ёғи ишлаб чиқариш заводи фойдаланишга топширилди. Лойиҳа қиймати 7 миллиард тенгени ташкил этади. Корхона бир суткада 300 тоннагача ёғ ишлаб чиқариш, 500 тоннагача уруғни тозалаш ва омухта ем ишлаб чиқариш қувватига эга. Бу ерда 120 дан ортиқ иш ўрни яратилди, маҳсулот ички бозор ва экспортга йўналтирилган.
Қизилўрда вилоятининг Жанақорған туманида қиймати 5,5 миллиард тенге бўлган паррандачилик фабрикаси очилди. Корхонанинг қуввати — йилига қарийб 6 минг тонна парранда гўшти ишлаб чиқаришга тенг. 12 та паррандачилик биноси, сўйиш ва инкубация цехлари мавжуд объектда 120 та иш ўрни яратилди. Маҳсулот вилоят ва қўшни ҳудудларга етказиб берилади.
Қарағанди вилоятида ғишт заводи ишга туширилди. Лойиҳага киритилган инвестицияларнинг умумий ҳажми 1,5 миллиард тенгедан ортиқ. Корхонанинг қуввати — йилига 45 миллион дона ғишт ишлаб чиқариш. Ўзининг хусусий лой кон конига эга бўлган объект ишлаб чиқаришнинг тўлиқ циклини қамраб олган. Унда ишлаб чиқариладиган маҳсулотлар Қарағанди ва Ақмола вилоятлари эҳтиёжларини таъминлайди.
Қизилўрда вилоятининг Жанақорған қишлоғида сув тақсимлаш станцияси ва сув етказиб бериш тармоғи фойдаланишга топширилди. Қиймати 1,1 миллиард тенге бўлган лойиҳа давлатга қайтарилган активлар маблағлари ҳисобидан амалга оширилди. Натижада қарийб 1500 та хонадон сифатли ичимлик суви билан таъминланди.
Талдиқорған шаҳрида ижтимоий ҳимояга муҳтож тоифага кирувчи 41 оила «Береке» коттеж шаҳарчаси, «Жастар-3» турар жой массиви, «Шығыс», «Құлагер» микрорайонлари ва Қ. Жалайири хиёбонидан янги уй-жой калитларини олди. Бу йил вилоят марказида қарийб 1,4 минг киши янги уйга кўчиб, янги хонадонли бўлади.
Чимкент шаҳрида навбатда турган 80 та оила — кўп болали ва тўлиқ бўлмаган оилалар, ногиронлиги бўлган фуқаролар ҳамда етим болалар — уй-жой сотиб олиш ҳуқуқи билан ижарага бериладиган уй-жой дастури доирасида хонадонларга эга бўлди.
Туркистон вилояти Сауран тумани Шорнақ қишлоғида қиймати 1,7 миллиард тенге бўлган янги спорт мажмуаси фойдаланишга топширилди. 1 гектар майдонни эгаллаган объектда баскетбол, бокс, кураш ва спорт заллари жойлашган. 40 та янги иш ўрни яратилди.
Туркистон вилояти Кентау шаҳрининг Қарноқ турар жой массивида 300 ўринга мўлжалланган Дўстлик уйи биноси очилди. Бинонинг умумий майдони 2,8 минг квадрат метрни ташкил этади. Объект маданий-оммавий тадбирларни ўтказиш учун замонавий жиҳозлар билан тўлиқ таъминланган.