2026 йил 10-11 август кунлари Қозоғистон ва Ўзбекистон транспорт идоралари вакиллари Қозоғистон — Хитой чегарасидаги транспорт-логистика инфратузилмаси объектларини биргаликда кўздан кечирди.
Амалий ташриф икки томонлама ҳамкорлик бўйича Қўшма ҳукуматлараро комиссиянинг 23-йиғилиши якунлари бўйича эришилган келишувларни амалга ошириш доирасида ташкил этилди. Икки мамлакат делегацияларига Қозоғистон Республикаси транспорт вазири ўринбосари Жанибек Тайжанов ва Ўзбекистон Республикаси транспорт вазирининг биринчи ўринбосари Маманбий Омаров бошчилик қилди.
Амалий ташриф доирасида делегациялар Алтинкўл темир йўл станцияси, «Кедентранссервис» терминали, «KTZE-Khorgos Gateway» қуруқ порти, шунингдек, «Хоргос — Шарқий дарвоза» махсус иқтисодий зонасига ташриф буюрди.
Ўзбекистон томонига Хитойдан келаётган юкларни қабул қилиш, қайта ишлаш ва қайта юклашнинг амалдаги механизмлари, Қозоғистоннинг темир йўл ва терминал инфратузилмаси имкониятлари, шунингдек, юкларни халқаро транспорт йўналишлари бўйича кейинги манзилга жўнатиш жараёни амалиётда намойиш этилди.
Томонлар Хитой — Қозоғистон — Ўзбекистон йўналиши бўйича юк оқимини ошириш, мавжуд терминал қувватларидан янада самарали фойдаланиш ва қўшма логистика ечимларини ривожлантириш истиқболларига алоҳида эътибор қаратди.
Ташриф якунлари бўйича томонлар ташиш ҳажмини ошириш, терминал инфратузилмасини ривожлантириш ҳамда Қозоғистон ва Ўзбекистоннинг транспорт-логистик ҳамкорлигини мустаҳкамлашга қаратилган қўшма ташаббусларни мазмунли тарзда ишлаб чиқишни давом эттиришга келишиб олди.