Қозоғистон ва Туркманистон чегарадош ҳудудларда қўшма лойиҳаларни ривожлантиришдан манфаатдор

ASTANA. Kazinform — Туркманистоннинг Аваза шаҳрида Қурултой раиси Айбек Дадебай ва Туркманистон Мажлиси раиси Дунягўзел Гулманова парламентлараро ҳамкорликни ривожлантириш масалаларини муҳокама қилди.

Фото: Құрылтай

Учрашув МДҲ Парламентлараро Ассамблеяси Кенгашининг 61-ялпи мажлиси арафасида бўлиб ўтди.

Айбек Дадебай туркманистонлик ҳамкасбларига самимий меҳмондўстлик учун миннатдорлик билдириб, Туркманистон Мажлисини МДҲ Парламентлараро Ассамблеясида кузатувчи мақомини олгани билан табриклади. У миллий парламент илк бор бундай мақомга эга бўлаётганини таъкидлади.

Шунингдек, Қурултой раиси Туркманистоннинг 2026 йилда МДҲга раислик қилувчи давлат сифатида БМТ ва МДҲ ўртасидаги алоқаларни мустаҳкамлаш ташаббусини юқори баҳолаб, БМТнинг тегишли резолюцияси қабул қилингани билан табриклади.

Айбек Дадебай қозоғистонликлар биродар туркман халқига алоҳида меҳр ва ҳурмат билан муносабатда бўлишини таъкидлаб, Президент Сердар Бердимуҳамедов раҳбарлигида стратегик йўналишларни амалга ошираётган Туркманистонга муваффақиятлар тилади.

Икки томонлама муносабатларга тўхталар экан, Қурултой раиси Туркманистонни Қозоғистон билан асрлар давомидаги дўстлик ва яхши қўшничилик алоқалари боғлаб турган стратегик ҳамкор ҳамда яқин мамлакат деб атади.

“Давлатларимиз раҳбарлари қозоқ-туркман ҳамкорлигини мустаҳкамлаш учун катта саъй-ҳаракатларни амалга оширмоқда. Қўшма кун тартибимиз энергетика, қишлоқ хўжалиги, соғлиқни сақлаш, транзит ва транспорт, таълим ҳамда маданият соҳаларини қамраб олган ҳолда изчил кенгайиб бормоқда. Икки мамлакат парламентлари вакилларининг вазифаси — юқори даражада эришилган келишувларнинг амалга оширилишига кўмаклашиш”, - деди Айбек Дадебай.

Учрашув давомида Қурултой раиси ҳамкасбига Президент Қасим-Жомарт Тоқаевнинг сиёсий ислоҳотлари асосий босқичларидан бири — бир палатали Қурултойга ўтиш ҳақида маълумот берди.

Унинг таъкидлашича, янги Қурултой қонунчилик жараёнини тезлаштириши, давлат бошқарувини янада очиқ ва самарали қилиши керак.

Қурултой таркибига бешта сиёсий партиядан 145 нафар депутат сайланган. Уларнинг 49 нафари аёллардир. Айни пайтда Қурултойда Туркманистон Мажлиси билан ҳамкорлик бўйича гуруҳ ташкил этилган.

Ўз навбатида, Дунягўзел Гулманова қозоғистонлик ҳамкасбларини Қурултой ташкил этилгани ва сиёсий ислоҳотларнинг муваффақиятли амалга оширилаётгани билан табриклаб, Қозоғистонга янада равнақ топишини тилади.

Туркманистон Мажлиси раиси икки томонлама ва кўп томонлама ҳамкорликни кенгайтириш, шунингдек, парламентлараро алоқаларда гендер вакиллигини мустаҳкамлаш масалаларига алоҳида эътибор қаратди.

Томонлар ҳудудлараро ҳамкорликни ривожлантириш масалаларини ҳам муҳокама қилди.

Айбек Дадебайнинг фикрича, чегарадош ҳудудлар ўртасидаги мунтазам алоқалар тўғридан-тўғри ишбилармонлик муносабатларини йўлга қўйиш ҳамда савдо, логистика ва маданият соҳаларида янги қўшма лойиҳаларни амалга ошириш имконини беради.

Икки мамлакат парламентлари бундай ташаббусларни қўллаб-қувватлаши мумкин.

Эслатиб ўтамиз, бундан аввал Қурултой раиси Айбек Дадебай бошчилигидаги делегация Душанбе шаҳрида бўлиб ўтган Марказий Осиё давлатларининг IV Парламентлараро форумида иштирок этган эди. Йиғилиш якунлари бўйича парламентлараро ҳамкорликни ривожлантиришга қаратилган Душанбе декларацияси қабул қилинган.