Қозоғистон ва Эрон ўртасидаги савдо ҳажми ортади – қонун қабул қилинди

ASTANA. Кazinform – Сенатнинг ялпи мажлисида « 2018 йил 17 майдаги бир томондан ЕОИИ ва унга аъзо давлатлар, иккинчи томондан Эрон ўртасида эркин савдо ҳудудини яратишга олиб келадиган вақтинчалик битим тўғрисидаги баённомани ратификатсия қилиш ҳақида»ги қонун қабул қилинди, деб хабар беради Кazinform мухбири.

Протоколдан кўзланган мақсад вақтинчалик Битимнинг амал қилиш муддатини 2025 йил 27 октябргача узайтириш ва томонлар ўртасида имтиёзли савдо режими келишмовчилигининг олдини олишдан иборат.

«Протокол Евроосиё иқтисодий иттифоқига аъзо давлатлар ва Эрон ўртасидаги иқтисодий алоқаларни мустаҳкамлашга қаратилган. Қабул қилинган қонун Қозоғистон ва Эрон ўртасидаги товар айирбошлаш ҳажмининг ошишига ижобий таъсир кўрсатади, деб ҳисоблаймиз», — деди Сенат раиси Маулен Ашимбаев.

Сенатнинг Иқтисодий сиёсат, инновацион ривожланиш ва тадбиркорлик масалалари қўмитасидан маълум қилишларича, мазкур ҳужжат бир қатор товарларга нисбатан тариф ва нотариф тўсиқларини камайтириш орқали мамлакатлар ўртасидаги товар айирбошлашни эркинлаштириш ва соддалаштиришга қаратилган.

Шу билан бирга, эркин савдо зонасини шакллантириш учун асос яратишга қаратилган бўлиб, унинг доирасида халқаро тамойиллар, стандартлар ва амалиётларга мувофиқ Томонлар ўртасидаги савдо билан боғлиқ божхона тўловлари ва бошқа чекловчи чоралар бекор қилинади.

Битим давлатлар ўртасидаги иқтисодий ва савдо ҳамкорлигини қўллаб-қувватлаш, яқин ҳамкорликни ривожлантиришга қаратилган.

Муаллиф: Руслан Ғаббасов