Қозоғистон трансчегаравий дарёлар сувидан фойдаланишни тартибга солувчи халқаро конвенцияга қўшилди

ASTANA. Кazinform – ҚР Сув ресурслари ва ирригация вазирлиги трансчегаравий дарёлардан биргаликда сувдан фойдаланиш масаласини Халқаро сув оқимларини кема қатновларидан бошқа фойдаланиш ҳуқуқлари тўғрисидаги конвенция доирасида ҳал қилмоқчи. ҚР Парламенти Сенати халқаро конвенцияни ратификация қилиш тўғрисидаги Қонунни маъқуллади.

Конвенция трансчегаравий дарёлар ва кўллар ҳамда улар билан боғлиқ ер ости сувларининг адолатли тақсимланишини таъминловчи ҳамда ундан фойдаланишни тартибга солувчи халқаро ҳужжатдир. Ҳозирги вақтда 37 давлат Конвенцияга аъзодир.

Халқаро шартнома сув тақсимоти бўйича юзага келиши мумкин бўлган низоларни ҳал қилиш ва барча томонлар манфаатларига мувофиқ сув ресурсларини ривожлантириш учун давлатлар ўртасида ҳамкорлик механизмларини яратади.

Конвенцияга мувофиқ, ҳудудидан сув оқиб ўтадиган давлат ўз ҳудудида халқаро сув оқимларидан фойдаланишда бошқа давлатларга зарар етказмаслик учун тегишли чораларни кўради. Шунингдек, у мунтазам равишда сув оқими, сув сифати ва тегишли прогнозлар бўйича мавжуд маълумотларни баҳам кўради. Бундан ташқари, ҳудудидан сув оқиб ўтадиган давлатлар бир-бири билан маслаҳатлашадилар, режалаштирилган тадбирларнинг халқаро сув оқимларига таъсири бўйича музокаралар олиб борадилар.

“Масалан, Конвенцияда гидротехник иншоотларни қуриш бўйича аниқ чора-тадбирлар белгиланган. Хусусан, манфаатдор шахсларнинг розилигисиз амалга оширишга рухсат бермасликлари ёзилган. Шу нуқтаи назардан, қўшни давлатлар билан ҳамкорлик доирасида сув хўжалиги фаолиятини мувофиқлаштирилган ҳолда амалга ошириш таъминланади. Бундан ташқари, вазирлик трансчегаравий дарёлар сувидан биргаликда фойдаланиш масаласини Давлатлараро сув хўжалиги комиссияси орқали ҳал қилади”, — деди ҚР Сув ресурслари ва ирригация вазирининг биринчи ўринбосари Болат Бекнияз.