Ҳурматли ватандошлар!
Барчангизни миллий байрамимиз — Республика куни билан табриклайман!
Бу — минг йилликлар тарихига бориб тақаладиган қозоқ давлатчилигининг қайта тикланишини ифодаловчи муқаддас байрамдир.
Мустақиллик йилларида биз кўплаб синов ва қийинчиликларни енгиб ўтдик, юксак марраларни забт этдик. Шу тариқа мамлакатимиз пойдеворини мустаҳкамлаб, давлатчилигимиз таянчини янада кучайтирдик.
Қозоғистон Мустақилликнинг 35 йиллик маррасига иқтисодиёти қудратли, жамияти бунёдкор, бутун жаҳон ҳамжамияти ҳурмат қиладиган, нуфузи баланд ва таъсирчан ўрта қудратли давлат, цивилизациялашган мамлакат сифатида етиб келмоқда.
Бу йил биз миллат йилномасида янги саҳифа очдик ва тарихий юксалиш даврида муҳим қадам ташладик.
Олдимизга қўйилган мақсад ҳамма учун аниқ. Биз кучли давлат институтлари ва сифатли инсон капиталига эга, глобал миқёсда рақобатбардош, илғор, ривожланган, бунёдкор ва дунёвий мамлакат бўлишимиз керак.
Шу муносабат билан Конституциямизнинг қонуний кучга кириши халқаро ҳамжамият эътиборини тортган, тарихий аҳамияти ниҳоятда катта воқеа бўлди.
Конституция давлат бошқаруви тизимини тубдан янгилашга, мамлакатимизнинг сиёсий, иқтисодий, маданий ва ижтимоий соҳаларида чуқур ўзгаришларни амалга оширишга катта туртки берди.
Биз Конституцияда белгиланган қадриятларга таянган ҳолда, стратегик йўналишимиздан оғишмай, албатта олдинга қадам ташлаймиз ва олдимизга қўйган барча вазифаларни амалга оширамиз.
Ҳозирги вақтда илғор технологиялар ва инновацияларни изчил ривожлантириб, сунъий интеллект имкониятларидан мамлакатимиз фаровонлиги йўлида фойдалана бошладик.
Замонавий ишлаб чиқариш корхоналарини очиб, инфратузилмани модернизация қилмоқдамиз, мактаблар, шифохоналар ва бошқа ижтимоий объектларни барпо этмоқдамиз. Халқимиз фаровонлиги йўлида кўплаб лойиҳаларни амалга оширишни режалаштирганмиз.
Энг муҳими, узоқни кўзлаган миллат сифатида бунёдкор мақсадлар ва буюк орзулар йўлида бирлашиб, ёрқин келажакка катта ишонч билан интилмоқдамиз.
Бугунги кунда билимга интилиш, ҳалол меҳнат, юксак масъулият ва самимий ватанпарварлик фазилатлари халқимизнинг табиатига сингиб, ҳаётий одатига айланиб бормоқда.
Биз Қонун ва Тартиб, Тозалик ва Атроф-муҳитни муҳофаза қилиш, Бирлик ва Ҳамжиҳатлик қадриятларини кенг тарғиб этиб, жамиятда янги ахлоқий тамойилларни шакллантиришга киришдик.
Шу тариқа суверенитетимиз пойдеворини мустаҳкамлаб, Адолатли, Хавфсиз, Илғор ва Тоза Қозоғистонни барпо этмоқдамиз.
Мовий байроғимиз доимо юксакларда ҳилпираб турсин! Ватанимиз гуллаб-яшнасин!
Республика куни муборак бўлсин!