Қозоғистон илк бор ушбу нуфузли гид географиясидан жой олди. Мамлакат меҳмонхоналари нафақат нуфузли тўпламга киритилди, балки MICHELIN Key махсус белгисига ҳам эга бўлди.
MICHELIN Key — меҳмонхона соҳасидаги кулинариядаги «Мишлен юлдузи»нинг расмий аналоги ҳисобланади. Мустақил ва аноним инспекция натижаларига кўра, мамлакатдаги 5 та меҳмонхона One MICHELIN Key («Бир Мишлен калити») белгисига сазовор бўлди:
- The Veil Hotel (Астана шаҳри)
- The St. Regis Astana (Астана шаҳри)
- The Ritz-Carlton, Astana (Астана шаҳри)
- The Ritz-Carlton, Almaty (Алмати шаҳри)
- Tenir Eco Hotel (Алмати шаҳри)
Бундан ташқари, MICHELIN Guide тавсияларининг умумий тоифасига Қозоғистоннинг яна 9 та меҳмонхонаси киритилди. Улар орасида Sheraton Astana Hotel, Swissôtel Wellness Resort Alatau Almaty, Qazaq Auyl Eco Hotel, Qazaq Garden, Donatello Premium Almaty, Radisson Blu Hotel Almaty Airport, Zvezdnaya Eco-Hotel, YURTA Boutique Hotel ва Medina Palace Hotel бор.
“Қозоғистон меҳмонхоналарининг ушбу нуфузли рўйхатдан жой олиши туристик инфратузилмани тизимли ривожлантириш ва меҳмондўстлик стандартларини оширишга қаратилган стратегик ташаббуслар туфайли имконли бўлди. Халқаро даражадаги бундай баҳолаш Қозоғистоннинг юқори сифатли туризм маркази сифатидаги нуфузини ошириб, хорижий сайёҳлар учун жозибадорлигини янада кучайтиради”, — дейилади хабарда.
MICHELIN Key белгиси 2024 йилда меҳмонхона соҳасини мустақил баҳолаш мақсадида таъсис этилган. Баҳолаш жараёнида 1900 йилдан буён ресторанларга нисбатан қўлланиб келинаётган қатъий услуб ва юқори талаблар асос қилиб олинади. Меҳмонхоналар аноним инспекторлар томонидан бешта универсал мезон асосида баҳоланади: меҳмонхона меҳмонга ҳудуднинг ўзига хос жиҳатларини очиб бера олиши, архитектура ва интерьер дизайни сифати, хизмат кўрсатиш сифати ва қулайликнинг барқарорлиги, нарх ва кўрсатилаётган хизматларнинг мутаносиблиги, шунингдек, объектнинг ўзига хослиги ва миллий колорити.
One MICHELIN Key («Алоҳида дам олиш») белгиси ўзига хос хусусиятларга эга бўлган ва ўз тоифасидаги ўртача соҳавий кўрсаткичлардан анча юқори даражада хизмат кўрсатадиган меҳмонхоналарга берилади.