Ушбу масалалар Астанада бўлиб ўтган икки мамлакат ўртасидаги сиёсий маслаҳатлашувларнинг навбатдаги босқичида кўриб чиқилди, деб хабар беради ҚР Ташқи ишлар вазирлиги матбуот хизмати.
Қозоғистон делегациясига Ташқи ишлар вазирининг ўринбосари Арман Исағалиев, Германия делегациясига эса Ташқи ишлар вазирлигининг Осиё ва Тинч океани департаменти директори ўринбосари, элчи Йоахим Бертеле бошчилик қилди.
Учрашувда икки томонлама муносабатларнинг ҳозирги ҳолати ва ривожланиш имкониятлари муҳокама қилинди. Томонлар Қозоғистон Президенти Қасим-Жомарт Тоқаевнинг 29-30 сентябрь кунлари Германияга расмий ташрифи давомида эришилган келишувларни амалга оширишга устувор аҳамият беришди.
Арман Исағалиев германиялик ҳамкасбини Қозоғистонда амалга оширилаётган сиёсий ислоҳотлар билан таништирди. Шунингдек, улар икки мамлакат раҳбарлари даражасидаги алоқаларнинг жадал ривожланиб бораётганини таъкидладилар ва турли соҳалардаги ҳамкорликни чуқурлаштириш ва қўшма лойиҳаларни илгари суриш бўйича таклифлар билдирдилар.
Ўз навбатида, Йоахим Бертеле Астана ва Берлин ўртасидаги конструктив мулоқотни давом эттириш, жумладан, кўп томонлама форумлардаги ҳамкорликнинг муҳимлигини таъкидлади. Шунингдек, у Германиянинг Қозоғистон билан ўзаро манфаатли шерикликни кенгайтиришга тайёрлигини тасдиқлади.
Музокараларда саноат кооперацияси, муҳим хомашё, энергетика, транспорт ва логистика, рақамлаштириш ва илғор технологиялар соҳаларида қўшма ишларни ривожлантириш масалалари муҳокама қилинди.
Томонлар шунингдек, 2026-2028 йилларга мўлжалланган саноат, технологик ва хомашё ҳамкорлигини ривожлантириш бўйича қўшма йўл харитасининг боришини ҳам муҳокама қилдилар.
Бундан ташқари, маданият, таълим ва фан соҳаларидаги алоқаларни мустаҳкамлаш, олий таълим муассасалари ўртасидаги шерикликни кенгайтириш ва малакали мутахассисларни тайёрлаш масалалари муҳокама қилинди. Қозоғистондаги немис ҳамжамиятининг икки мамлакат ўртасидаги дўстона муносабатларни ривожлантиришдаги роли қайд этилди.
Учрашувда "Марказий Осиё — Германия" формати, Европа Иттифоқи билан ҳамкорлик, БМТ ва ЕХҲТ доирасидаги ўзаро алоқалар ва халқаро кун тартибидаги долзарб масалалар бўйича фикр алмашилди.
Музокаралар натижасида томонлар 2027 йилда, дипломатик муносабатлар ўрнатилганининг 35 йиллиги муносабати билан сиёсий мулоқотни давом эттириш ва ўзаро манфаатли ҳамкорликни янада кенгайтиришдан манфаатдор эканликларини тасдиқладилар.
Эслатиб ўтамиз, Қозоғистон ва Германия сув соҳасида йирик лойиҳаларни биргаликда амалга оширади.