Бу ҳақда «Хитой-Қирғизистон-Ўзбекистон» темир йўл компанияси бош директори ўринбосари Улан Қулов «Биринчи радио» эфирида маълум қилди. Унинг айтишича, темир йўл юк ва йўловчи ташиш учун мўлжалланган.
“Бу юк ва йўловчи ташийдиган темир йўл бўлади. Фойдаланишга топширилганидан сўнг қирғизистонликлар Хитойга поездда тўғридан-тўғри боришлари мумкин бўлади. Йўловчилар учун замонавий, қулай ва тезюрар вагонларни харид қилишни режалаштирмоқдамиз”, — деди у.
Ҳозирда йўловчи поездлари қатнайдиган йўналишлар кўриб чиқилмоқда.
Режага мувофиқ, темир йўл 2031 йилда фойдаланишга топширилади. Қирғизистон ҳудудидан ўтадиган темир йўл участкаси узунлиги 304 километрни ташкил этади.
Ушбу йўналишда 29 та тоннель ва 50 та кўприк қурилади.
2025 йил апрель ойида Хитой-Қирғизистон-Ўзбекистон темир йўли учун тоннель қурилиши бошлангани ҳақида хабар берилган эди. Ўша йилнинг кузида магистрал қурилиши амалий босқичга ўтди.