Келгуси йилда Алмати иқтисодиёти 6,4 фоиз даражасида ўсади

ALMATY. Kazinform – Алмати барча ижтимоий-иқтисодий кўрсаткичлар бўйича ижобий динамикага эга. Бу ҳақда Алмати ҳокими Ерболат Досаев Марказий коммуникациялар хизматида бўлиб ўтган брифингда маълум қилди.

Шаҳар раҳбарининг таъкидлашича, ҚР Президентининг топшириқларини бажариш мақсадида 2022 йил сентябрь ойида шаҳарни 2030 йилгача ривожлантириш дастури қабул қилинган. Унинг асосий мақсади Алмати шаҳрини аҳолиси учун қулай ва хавфсиз шаҳарга айлантиришдир.

“Жорий йилда Алматида 2023 йилда рекорд даражадаги иқтисодий ўсишни ҳисобга олган ҳолда, иқтисодий ривожланишнинг юқори суръати 9,7 фоиз даражасида сақланиб қолмоқда. 2024 йилнинг 11 ойи натижаларига кўра, Алмати шаҳрининг қисқа муддатли иқтисодий кўрсаткичи 6,6 фоизга тезлашди. 2024 йил якунларига кўра, Алмати иқтисодиётининг ўсиши 5,5 фоиз даражасида кутилмоқда, 2025 йилда эса ўсиш 6,4 фоизгача ошади”, – деди Ерболат Досаев.

Эслатиб ўтамиз, 2023 йилда шаҳар иқтисодиёти 10,1 фоизга ўсиб, 24,8 триллион тенгега етган эди. Бу кейинги 10 йилдаги рекорд кўрсаткичдир.

Ерболат Досаев Алмати иқтисодиётининг асосий ҳаракатлантирувчиси кичик ва ўрта бизнес эканлигини таъкидлади. Ҳозирда ушбу соҳада банд бўлганларнинг 85 фоиздан ортиғи ёки 942 мингга яқин алматиликлар меҳнат қилмоқда.

“Кичик ва ўрта бизнесни қўллаб-қувватлаш ва ривожлантириш мақсадида 2024 йилда 1,8 мингта янги лойиҳани қўллаб-қувватлаш учун бюджетдан 53 миллиард тенге ажратилган бўлса, 2025 йилда 71 миллиард тенге миқдорида маблағ ажратилиши режалаштирилган. Бу кичик ва ўрта бизнеснинг яна 2 мингта янги лойиҳасини қўллаб-қувватлаш имконини беради. Мақсадимиз кичик ва ўрта бизнеснинг шаҳар иқтисодиётига қўшадиган ҳиссасини 2024 йилдаги 60 фоиздан 2030 йилга келиб 75 фоизга етказишдир”, – деди у.

Шундай қилиб, Алмати ўзининг барқарорлиги ва юксак салоҳияти билан Марказий Осиёнинг етакчи иқтисодий марказларидан бири сифатидаги мақомини мустаҳкамлашда давом этади.