Ҳужжатда қайд этилишича, мамлакат ҳукумати бу чорани Бош вазир Педро Санчес таклифига биноан ва «ҳалок бўлганлар хотирасига мотам тутиш белгиси сифатида» қабул қилган.
Сўнгги маълумотларга кўра, Испанияда содир бўлган темир йўл ҳалокати оқибатида 68 киши вафот этган. Қурбонлар сони яна ортиши мумкинлиги таъкидланмоқда.
Нашрнинг маълум қилишича, бу Испанияда 1970 йиллардан бери кўлами жиҳатидан учинчи йирик темир йўл ҳалокатидир. Шунингдек, бу 2026 йилда мамлакатда содир бўлган иккинчи йирик темир йўл авариясидир.
Январь ойида Адамус муниципалитети ҳудудида Малагадан Мадридга қараб ҳаракатланаётган юқори тезликдаги поезд рельсдан чиқиб кетиб, қарама-қарши йўналишда келаётган поезд билан тўқнашган. Тўқнашув оқибатида иккинчи поезд ҳам рельсдан чиқиб кетган. Ҳалокат натижасида 46 киши ҳалок бўлган, ўнлаб одамлар жароҳатланган.
Эслатиб ўтамиз, ҳодиса 28 октябрда маҳаллий вақт билан соат 08:54 атрофида Толедо вилоятидаги Урда шаҳри яқинида содир бўлган. Юқори тезликдаги темир йўл тармоғида давлатга қарашли Renfe компаниясининг AVE поезди хусусий ташувчи Iryo компаниясининг поезди билан тўқнашган.
Дастлабки маълумотларга кўра, Iryo поезди темир йўл изларида тўхтаб қолган. Шундан сўнг унинг ортидан келаётган Renfe поезди унга орқа томондан бориб урилган. Тўқнашув оқибатида бир нечта вагон рельсдан чиқиб кетган.
Ҳодиса жойида қутқарувчилар, ўт ўчирувчилар ва тиббий ёрдам гуруҳлари ишлашда давом этмоқда. Мадрид ва Андалусия ўртасидаги юқори тезликдаги поездлар қатнови тўхтатилган.
Ҳалокат сабаблари аниқланмоқда. Дастлабки тахминлар орасида сигнализация тизимидаги носозлик ва инсон омили ҳам кўриб чиқилмоқда.