Унинг сўзларига кўра, инвестициялар иқтисодий ўсишнинг асосий ҳаракатлантирувчи кучига айланмоқда. Жорий йил январь-сентябрь ойларида асосий капиталга киритилган инвестициялар 16,1 триллион тенгени ташкил этиб, 7 фоизга ошди.
“Бу ердаги муҳим жиҳат шундаки, инвестициялар ўсишининг асосий омили хусусий инвестициялар бўлиб, улар 18,2 фоизга кўпайди. Инвестицияларнинг энг сезиларли ўсиши қуйидаги соҳаларда кузатилди: қайта ишлаш саноатида — 40,1 фоиз, қурилишда — 32 фоиз, ахборот ва алоқа соҳасида — 29,2 фоиз, соғлиқни сақлашда — 20,4 фоиз, қишлоқ хўжалигида эса 9,1 фоиз. Асосий капиталга киритилган инвестициялар таркиби ҳам ўзгарди. Хусусий инвестицияларнинг улуши 85,7 фоизни ташкил этди. Жорий йилнинг биринчи ярим йиллигида тўғридан-тўғри хорижий инвестицияларнинг умумий оқими 9,4 миллиард долларга етди. Биринчи ярим йиллик якунларига кўра, экспортнинг жадал ўсиши шароитида савдо баланси ижобий сальдосининг кенгайиши ҳисобига тўлов балансининг жорий операциялар ҳисоби 2,4 миллиард доллар миқдорида профицит билан шаклланди”, — деди у.
Бош вазир ўринбосарининг таъкидлашича, савдо баланси профицити ўтган йилнинг мос даврига нисбатан икки баравардан кўпроқ ўсиб, 16,2 миллиард долларга етди. Саккиз ой якунларига кўра, савдо баланси кўрсаткичи 17,8 миллиард долларгача яхшиланди.
“Товарлар экспорти 60,4 миллиард долларни, товарлар импорти эса 42,6 миллиард долларни ташкил этди. Иқтисодий фаоллик юқори бўлган шароитда оралиқ товарлар импорти 13,8 фоизга, инвестиция товарлари импорти эса 7,9 фоизга ошганини алоҳида таъкидламоқчиман. Шу билан бирга, ноозиқ-овқат истеъмол товарлари импорти 11,2 фоизга қисқарди. Савдо балансидаги ижобий ўзгаришлар тўлов балансининг жорий операциялар ҳисоби ҳолатини яхшилаш ва бюджет тақчиллигини камайтириш учун замин яратади”, — деди Серик Жуманғарин.