Хитойнинг Марказий Осиё давлатлари билан савдо айланмасининг ярми Қозоғистон ҳиссасига тўғри келади
ALMATY. Kazinform – Алмати шаҳрида “Марказий Осиё-Хитой” форматидаги ташқи ишлар вазирларининг VI учрашуви бўлиб ўтмоқда.
Расмий қисм бошланишидан аввал делегациялар раҳбарларини Қозоғистон Республикаси Бош вазири ўринбосари, Ташқи ишлар вазири Мурат Нуртилеу табриклади.
Сўнгра иштирокчилар минтақавий ва халқаро ҳамкорликнинг долзарб масалаларини муҳокама қилишга ўтдилар.
Қозоғистон дипломатияси раҳбари ўз нутқида асосий сармоявий шерик бўлган Хитой билан кенг кўламли ҳамкорлик Қозоғистон учун ҳам, Марказий Осиё мамлакатлари учун ҳам устувор вазифа бўлиб қолаётганини таъкидлади.
“Хитой бизнинг стратегик ҳамкоримиз бўлиб, у билан ҳамкорлигимиз вақт синовидан ўтган ва ташқи шароитларга тобе бўлмаган мустаҳкам ўзаро ишонч пойдеворига қурилган. Марказий Осиё давлатлари салоҳиятини ХХРнинг улкан имкониятлари билан уйғунлаштириш мисли кўрилмаган минтақавий майдонда ўзаро манфаатлар ва мустаҳкам шериклик муносабатларини шакллантиришга йўл очади”, – деди Мурат Нуртилеу.
У ҳамкорлик тарихидаги муҳим воқеа 2023 йилда Сиань шаҳрида бўлиб ўтган биринчи Марказий Осиё – Хитой саммити бўлганини, унда мамлакатлар раҳбарлари савдо, транспорт, логистика, таълим, илм-фан ва бошқа соҳалардаги ҳамкорликни ривожлантиришнинг ўзига хос векторини белгилаб берганини эслатди.
Биргина 2024 йилнинг ўзида Марказий Осиё мамлакатлари билан Хитой ўртасидаги товар айирбошлаш рекорд даражада 95 миллиард долларга етди, унинг 46 фоизи Қозоғистонга тўғри келди.
Қозоғистон жорий йилнинг ёзида Астана шаҳрида бўлиб ўтадиган “Марказий Осиё – Хитой” форматидаги иккинчи саммитни ўтказишга алоҳида эътибор қаратмоқда.
Мурат Нуртилеу мамлакатда мазкур формат минтақавий ҳамкорлик механизмлари орасида флагман бўлиши учун барча ишлар қилинаётганини таъкидлади.