Хитойда жорий йилнинг биринчи ярмида никоҳдан ўтувчилар сони камайиб, ажрашувлар сони ортган. Бу ҳақда Хитой Фуқаролик ишлари вазирлиги маълумотларида маълум қилинган.
Йилнинг дастлабки олти ойида мамлакатда 3,28 миллионта никоҳ қайд этилган. Бу ўтган йилнинг шу давридаги 3,54 миллион кўрсаткичдан 260 мингтага кам. Айни пайтда ажрашувлар сони 52 мингтага ошиб, 1,38 миллионга етган. Ўтган йилнинг биринчи олти ойида 1,33 миллионта ажрашув қайд этилган эди.
Бу пасайиш 2025 йил май ойида никоҳни рўйхатдан ўтказишни фуқаронинг яшаш жойига боғлаш талабини бекор қилган умуммиллий қоидалар жорий этилганига қарамай кузатилмоқда. Энди Хитой Халқ Республикаси фуқаролари мамлакатдаги исталган Фуқаролик ҳолати далолатномаларини қайд этиш бўлимида (ФҲДЁ) никоҳдан ўтиши мумкин.
Хитойда никоҳлар сони 2013 йилда қайд этилган рекорд кўрсаткичдан кейин мунтазам равишда камайиб бормоқда. Ўша йили 13,47 миллион жуфтлик никоҳини расмий рўйхатдан ўтказган. 2019 йилда бу кўрсаткич 10 миллиондан пастга тушган бўлса, 2022 йилда 6,84 миллионга етиб, энг паст даражага тушган. 2023 йилда кўрсаткич қисқа муддатга ошиб, 7,68 миллионга етган бўлса-да, бу умумий пасайиш тенденциясини ўзгартира олмаган.
Аввалроқ Хитой қишлоқ ҳудудларида қалин пули миқдори ва тўйларга сарфланадиган харажатларни чеклаётгани хабар қилинган эди.