Касаллик авж олиши Алаппужа округидаги иккита фермада бир вақтнинг ўзида қайд этилди. Инфекция товуқлар, ўрдаклар ва беданаларда тасдиқланган.
Вируснинг янада тарқалишининг олдини олиш мақсадида ҳукумат паррандаларни оммавий равишда санитария қоидалари асосида сўйиш ва йўқ қилиш тўғрисида қарор қабул қилди. Ушбу ишларга тезкор ҳаракатланувчи олтита гуруҳ жалб этилди, яна иккитаси захирада.
Зарарланган фермалар атрофидаги 10 километр радиусдаги ҳудудга алоҳида эътибор қаратилади. Бу ерда кузатув зонаси ташкил этилган бўлиб, мутахассислар эпидемиологик вазиятни мунтазам назорат қилиб боради.
Парранда гриппи юқумлилик даражаси юқори бўлгани сабабли паррандачилик хўжаликлари учун жиддий хавф туғдиради. Касалликнинг бир шаклини келтириб чиқарувчи H5N1 вируси айрим ҳолларда одамларга ҳам юқиши мумкин.
Шу билан бирга, ҳозиргача Алаппужа округида одамларнинг ушбу вирус билан касаллангани ҳақида маълумот берилмаган.