ХАМАС Ғазодаги ҳокимиятни Фаластин миллий маъмуриятига топширишга тайёр
ASTANA. Kazinform - ХАМАС радикал ҳаракати Фаластин озодлик ташкилотига мактуб йўллаб, унда Ғазо секторини Фаластин миллий маъмурияти (ФММ) ва ҳукумат қўмитаси назоратига ўтказишга тайёрлигини маълум қилди, деб хабар беради Kazinform агентлиги ТАССга таяниб.
Sky News Arabia телеканали хабарига кўра, ХАМАС Ғазо амалдорлари янги маъмуриятда иш билан таъминланиши ва агар улар ишдан бўшатилса, маошларини олишда давом этиши шартини ҳам илгари сурган. Қайд этилишича, радикал ташкилот ўз делегациясининг Қоҳирадаги музокараларидан сўнг Мисрнинг “кучли босими” остида шундай қарорга келган.
Мисрнинг “Ал-Қоҳира ал-Ихбория” телеканали 15 февраль куни манбага таяниб хабар қилганидек, ХАМАС воситачиларга Исроил билан ўт очишни тўхтатиш бўйича келишувга риоя қилиш ниятида эканлигини ва келажакда Ғазо секторини бошқаришда иштирок этиш ниятида эмаслигини маълум қилди. Миср, манбага кўра, анклав аҳолисига ёрдам кўрсатиш ва уни реконструкция қилиш учун масъул бўлган вақтинчалик қўмита тузиш бўйича интенсив маслаҳатлашувлар олиб бормоқда.
Ғазонинг урушдан кейинги бошқаруви бўйича музокаралар ўтган йил давомида Миср воситачилигида Фаластиннинг ФАТҲ ва ХАМАС ҳаракати томонидан олиб борилди. Охирги тур 2024 йилнинг ноябрида Қоҳирада бўлиб ўтган. Натижада, умумфаластин миллий консенсус ҳукумати тузилгунга қадар секторда ҳокимиятни ўз қўлига оладиган жамоат қўллаб-қувватлаш қўмитасини ташкил этишга қарор қилинди. Вақтинчалик орган, Миср манбаларининг даъво қилишича, Фаластин президенти Маҳмуд Аббос фармони билан ташкил этилган ва Ғазода туғилган, лекин ҳеч қандай сиёсий партияга аъзо бўлмаган мустақил вакилларни ўз ичига олади.
Аввалроқ Ғазо секторида ўт очишни тўхтатиш келишуви доирасида гаровга олинган 3 нафар исроиллик Ғазодаги Қизил Хоч вакилларига топширилган эди.
ТАСС ҳамкор агентлиги томонидан Кazinform учун махсус тақдим этилган.