Ҳодиса тахминан 31 минг юридик шахсга таъсир кўрсатди. Мутахассислар фирибгарлик ва товламачилик хавфи ортиши ҳақида огоҳлантирмоқда.
Лихтенштейн — Швейцария ва Австрия ўртасида жойлашган, аҳолиси тахминан 41 минг киши бўлган князлик. Мамлакат Европадаги энг йирик молиявий марказлардан бири ҳисобланади. Бу ерда минглаб халқаро компаниялар, фондлар ва трастлар рўйхатдан ўтган.
Кибержиноятчилар компаниялар, фондлар ва трастларнинг ҳақиқий фойдали эгалари ҳақидаги маълумотларни сақлайдиган махфий реестрга (VwbP) кириш ҳуқуқига эга бўлишди.
Бош вазир Бригитте Хаас воқеадан афсусда эканлигини билдирди ва ҳужум ҳолатларини аниқлаш ва ахборот тизимлари хавфсизлигини тиклаш чоралари кўрилаётганини айтди.
Жабрланганлар орасида Лихтенштейндан ташқари Швейцария, Германия, Австрия ва бошқа мамлакатлар фуқаролари бўлиши мумкин. Реестрда уларнинг исмлари, туғилган саналари, фуқаролиги, яшаш мамлакати ва компания ёки фонддаги роли ҳақидаги маълумотлар мавжуд.
Киберхавфсизлик бўйича мутахассисларнинг таъкидлашича, бундай маълумотлар жиноятчилар учун жуда қимматлидир. Мавжуд шахсий маълумотлар фирибгарлик, шантаж ёки товламачилик учун ишлатилиши мумкин.
Ҳужумни содир этганлар ҳали аниқланмаган. Шунингдек, ҳеч қандай тўлов талаб қилинмаган ва ўғирланган маълумотларнинг даркнетда эълон қилинганлиги ҳақида ҳеч қандай аломат йўқ.
Мутахассисларнинг фикрига кўра, бу воқеа Лихтенштейннинг халқаро обрўсига жиддий путур етказди.
Эслатиб ўтамиз, Жанубий Кореяда хакерлар интим видеоларни сотиш учун 120 000 та кузатув камерасини бузиб киришди.