Pestel-Institut тадқиқоти маълумотларига кўра, бу Германияда сўнгги қарийб 20 йил ичидаги энг паст кўрсаткич ҳисобланади. Германия Европа Иттифоқида аҳолининг аксарияти уй-жойни ижарага оладиган ягона мамлакат бўлиб қолмоқда.
Таққослаш учун, Руминия аҳолисининг қарийб 94 фоизи шахсий уй-жойга эга, Словакияда — 93 фоиз, Венгрияда — 92 фоиз. Бу кўрсаткич бўйича охиридан иккинчи ўринда турган Австрияда шахсий уй-жойи бор аҳоли улуши қарийб 54 фоизни ташкил этади.
Шу билан бирга, Германия ҳудудларида вазият сезиларли даражада фарқ қилади. Саар ерларида аҳолининг қарийб 60 фоизи шахсий уй-жойга эга, Бранденбургда эса бу кўрсаткич 44 фоиздан юқори. Берлинда шахсий уй-жойи бор аҳоли улуши қарийб 16 фоизни, Гамбургда эса 20 фоиздан сал кўпроқни ташкил этади.
Мамлакатнинг ёш аҳолиси орасида шахсий уй-жой эгалари улуши айниқса паст. 25 ёшдан 45 ёшгача бўлган немисларнинг қарийб тўртдан уч қисми уй-жойни ижарага олади, тахминан ҳар тўртинчи кишининг шахсий кўчмас мулки бор.
Экспертлар асосий сабаблар қаторида қурилиш ва ер участкаларининг қимматлиги, кредит фоиз ставкаларининг ошиши, шунингдек, давлат томонидан қўллаб-қувватлашнинг етарли эмаслигини қайд этяптилар. Натижада шахсий кўчмас мулк сотиб олиш ҳатто икки нафар даромад олувчи кўплаб оилалар учун ҳам имконсиз бўлиб қоляпти.
Экспертлар бу ҳолатнинг узоқ муддатли ижтимоий оқибатларига ҳам эътибор қаратган. Шахсий кўчмас мулк капитал жамғариш ва пенсияга чиққанидан кейин молиявий барқарорликни таъминлашнинг бир усули сифатида қаралади. Кексайганида уй-жой ижара қилишда давом этадиган одамлар қўшимча харажатларни кўтаришга мажбур бўлади. Бу нафақахўрлар орасида камбағаллик хавфини ошириши мумкин.