Полиция маълумотларига кўра, Фильдерштадт-Бонланден шаҳридаги икки оила вафли батончиклари ичидан игналар топган. Бу ҳақда Tagesschau портали хабар бермоқда.
Шунингдек, Бавариядаги айрим чайналадиган конфетлар ва шоколад батончиклари ичидан винтлар топилган. Нюрнберг ва Нойбург шаҳарларида эса болалар бир неча бор шоколад батончиклари ичидан игна топишган. Бу ҳақда Stern нашри хабар бермоқда.
Ота-оналар ушбу ҳолатлар ҳақида полицияга хабар берган. Ҳозирда тергов ишлари олиб бориляпти. Ҳеч ким жабрланмаган.
Полиция, шунингдек, болалар йиғиб келган ҳар қандай ширинликни истеъмол қилишдан олдин яхшилаб текширишни тавсия қиляпти.
Шуни таъкидлаш керакки, бу ҳолатлар Германия бўйлаб кенг тарқалгани ҳақида маълумот йўқ. Мамлакатнинг айрим шаҳарлари аҳолиси шунга ўхшаш воқеалар ҳақида хабар берган, бироқ улар ҳали тасдиқланмаган.