Rumavi Global Relocation Index 2026 рейтинги ҳаёт сифати, хавфсизлик, тиббий хизматлардан фойдаланиш имконияти, иқтисодий имкониятлар ва молиявий истиқболлар каби 24 та мезон асосида тузилган.
Биринчи ўнликка қуйидаги мамлакатлар кирди:
- Эстония;
- Сингапур;
- Малайзия;
- Португалия;
- Тайвань;
- Литва;
- Гонконг;
- Сент-Китс ва Невис;
- Чехия;
- Мальта.
Европанинг йирик мамлакатлари рейтингда анча паст ўринларни эгаллади: Испания 21-ўринда, Германия 50-ўринда, Буюк Британия 49-ўринда ва Франция 79-ўринда қайд этилган. Бироқ рейтинг ушбу мамлакатларда яшаётган мигрантларнинг ҳақиқий сонини акс эттирмайди.
БМТнинг 2024 йилги маълумотларига кўра, халқаро мигрантлар энг кўп АҚШда — тахминан 52,4 миллион нафар. Кейинги ўринларда Германия (16,8 миллион), Саудия Арабистони (13,7 миллион), Буюк Британия (11,8 миллион), Франция (9,2 миллион), Испания (8,9 миллион), Канада (8,8 миллион) ва БАА (8,2 миллион) туради.
Rumavi — хорижга кўчиш, инвестиция киритиш ва яшаш масалаларига ихтисослашган компания. Унинг 2026 йилги Global Relocation Index рейтинги 192 та мамлакатни қамраб олади.
Аввалроқ Remitly томонидан тузилган кўчиб ўтиш йўналишлари бўйича яна бир рейтинг эълон қилинган эди. Унда Қозоғистон 82 та мамлакат орасида 53-ўринни эгаллаган бўлса, Швейцария, Исландия, Люксембург, Австралия ва Германия кучли бешликни якунлаган.