Жанг 28 августда Астана шаҳридаги Жақсилиқ Ушкемпиров номидаги Жанглар саройида бўлиб ўтадиган International Boxing Day турнири доирасида ташкил этилади. Тоқтар ва Исроилов кечанинг қўшма асосий жангида рингга кўтарилади.
Жанг профессионал бокс қоидалари асосида иккинчи ўрта вазн тоифасида ўтказилади. Ташкилотчилар маълумотига кўра, Бобиржон Исроилов муай-тай бўйича жаҳон чемпиони ҳисобланади.
Рақиби ҳақида нималар маълум?
27 ёшли Бобиржон Исроилов Марказий Осиёдаги OCTAGON MMA лигасининг медиа дивизионида иштирок этмоқда. У муай-тай базасига эга бўлиб, жанглардаги ёрқин услуби ва фаол трэш-токи билан танилган.
Исроилов сўнгги бор OCTAGON 88 турнирида ММА қоидалари асосида жанг қилган ва Туркманистон вакили Эзиз Дурдиевни уч раунд якунларига кўра ҳакамларнинг якдил қарори билан мағлуб этган.
Еркебулан Тоқтарнинг сўнгги жанги
Еркебулан Тоқтар 4 июлда Алматида бўлиб ўтган IBA Nomad 15 турнирида Артём Тарасов билан жанг қилган. ММА қўлқопларида, бокс қоидалари асосида ўтказилган жангда қозоғистонлик спортчи биринчи раундда техник нокаут билан ғалаба қозонган.
Тоқтар аввал поп-ММА мусобақаларида танилган, кейинчалик профессионал жангларга ўтган. У Қозоғистондаги энг машҳур медиа-файтерлардан бири ҳисобланади.
Турнирда яна кимлар жанг қилади?
International Boxing Day кечасининг асосий жангида ҳаваскор бокс бўйича икки карра жаҳон чемпиони Санжар Ташкенбай иштирок этади. У IBF Asia чемпионлик камари учун филиппинлик Нил Джакамос билан жанг қилади.
Шунингдек, жаҳон чемпиони Сакен Бибосинов WBO Africa камари соҳиби, Намибия вакили Иммануэль Йозеф билан рингга кўтарилади.
International Boxing Day турнири 28 августда Астанада бўлиб ўтади.