Елена Рибакинанинг жаҳон рейтингидаги ўрини маълум бўлди

ASTANA. Kazinform — Аёллар теннис ассоциацияси (WТА) яккалик ва жуфтлик баҳсларида янгиланган рейтингни эълон қилди.

Мадриддаги WТА 1000 турнирининг учинчи босқичидан ўта олмаган қозоғистонлик етакчи теннисчи Елена Рибакина 11-ўриндан 12-ўринга тушиб кетди.

Мазкур турнир ғолиби беларуслик Арина Соболенко пешқадамликни давом эттираётган бўлса, польшалик Ига Швентек иккинчи, Мадридда финалга чиққан америкалик Кори Гауфф эса учинчи ўринда.

Испания пойтахтида иккинчи босқичдан ўта олмаган яна бир қозоғистонлик Юлия Путинцева 24-ўриндан 29-ўринга тушиб кетди.

Жуфтлик баҳсларида Анна Данилина 17-ўринни сақлаб қолган бўлса, Юлия Путинцева 76-ўриндан 77-ўринга, Жибек Қуламбаева Германиянинг Висбаден шаҳрида ITF W100 турнирида ғолиб чиққанига қарамай, 106-ўриндан 127-ўринга тушиб кетди.

Елена Рибакина ва Юлия Путинцева Римда (Италия) бўлиб ўтадиган WТА 1000 турнирида яхши натижа кўрсатса, ўз рейтингини яхшилаши мумкин.

Эслатиб ўтамиз, аввалроқ Жибек Қуламбаева Германияда ўтказилган мусобақада устунлик қилгани ҳақида хабар берган эдик.