“2026 йил январь-август ойларида расмий дилерлар NEV (New Energy Vehicles) сегментидаги 6 003 та енгил автомобилни сотди. Бу ўтган йилнинг шу давридаги кўрсаткичдан (1 953 та автомобиль) 207,4 фоизга кўп”, — дейилади ҚАИ маълумотида.
Асосий савдо ҳажмини қувватланадиган гибридлар (PHEV) ва ҳаракат масофаси кенгайтирилган электромобиллар (EREV) ташкил этди — 4 351 та автомобиль ёки умумий NEV сегментининг 72,5 фоизи. Ушбу сегментдаги автомобиллар ҳисобот даврида тўрт баробардан зиёд ўсди (1 008 тадан 4 351 тагача). Тўлиқ электрда ҳаракатланадиган автомобиллар (BEV) савдоси эса 2025 йилнинг дастлабки саккиз ойига нисбатан 74,8 фоизга ошди (945 тадан 1 652 тагача).
“Саккиз ой давомида Қозоғистонда NEV сегментидаги автомобиллар савдоси 6 мингдан ошди. Харидорлар асосан кундалик сафарлар учун мос электромобилларга қизиқмоқда, бироқ узоқ масофага сафар қилганда транспорт воситасидан самарали фойдаланиш имкониятини ҳам ҳисобга олмоқда. Шунинг учун ҳозир қувватланадиган гибридлар ва ҳаракат масофаси кенгайтирилган моделларга талаб ортмоқда”, — деди ҚАИ президенти Анар Мақашева.
NEV бозорида BYD автомобиллари етакчилик қилмоқда. Саккиз ойда дилерлар ушбу бренднинг 3 208 та автомобилини сотди. 2026 йил август ойида BYD илк бор мамлакатда энг кўп сотиладиган ТОП-10 автомобиллар рўйхатига кирди. Иккинчи ўринни Geely Galaxy — 1 244 та автомобиль, учинчи ўринни эса Li — 888 та автомобиль эгаллади. ТОП-5 таликка шунингдек Zeekr (214 та) ва ROX (131 та) кирди.
Қозоғистонда талаби ошган автомобиллар:
- Geely Galaxy EX5 EM-i — 1 205 та автомобиль;
- BYD Song Plus DM-i — 1 196;
- BYD Song Plus EV — 576;
- BYD Chazor — 572;
- BYD Yuan Up — 555;
- Li L6 — 504;
- Li L7 — 257;
- BYD Sealion 7 — 137;
- ROX 01 — 131;
- Li L9 — 126 та автомобиль.
“Шунингдек, саккиз ой давомида расмий дилерлар классик гибридларни (HEV) 1 284 та сотди. Бир йил аввал бундай автомобиллардан 1 209 таси сотилган. Етакчи — Toyota (1 208 та автомобиль), ундан кейин Lexus (63 та) ва Porsche (13 та) жойлашди”, — дейилади ҚАИ маълумотида.
PHEV (Plug-in Hybrid Electric Vehicle) — бензин двигатели ва аккумуляторни махсус станция орқали қувватлаш имкониятига эга электр моторли гибрид автомобиль.
EREV (Electric Range Extended Vehicle) — ғилдиракларни электр мотор айлантиради, бензин двигатели эса аккумуляторни қувватлайдиган генератор вазифасини бажаради.
BEV (Battery Electric Vehicle) — фақат аккумулятор батареяси энергияси ҳисобига ҳаракатланадиган автомобиль.
HEV (Hybrid Electric Vehicle) — одатий бензин ёки дизель двигатели ва кичик аккумуляторли электр моторни бирлаштирган классик гибрид автомобиль.
Дунёда электромобилларнинг улуши ортиб бормоқда
Жорий йил 1 июнь ҳолатига кўра, Қозоғистонда 24 634 та енгил электромобиль рўйхатдан ўтказилган.
Энг кўп электромобиль Алмати шаҳрида рўйхатга олинган. Ушбу шаҳар ҳиссасига мамлакатдаги барча электромобилларнинг 62 фоизи тўғри келади. Сони бўйича етакчи учликка, шунингдек, Астана шаҳри ва Алмати вилояти кирди.
Халқаро энергетика агентлиги (ХЭА) прогнозларига кўра, 2026 йилда дунёда электромобиллар савдоси яна ўсиб, 23 миллионтага етади. Бу жаҳонда сотиладиган барча автомобилларнинг тахминан 30 фоизини ташкил этади.
Дунёда импорт қилинаётган электромобилларнинг ярмидан кўпи Хитойдан келади. Хитой электромобиллар ишлаб чиқариш бўйича дунёдаги энг йирик марказ бўлиб қолмоқда. Унинг улушига ўтган йили дунёда ишлаб чиқарилган 22 миллионта электромобилнинг қарийб тўртдан уч қисми тўғри келган. Ишлаб чиқариш ички талабдан ошиб кетгани сабабли, Хитойнинг электромобиллар экспорти икки баробарга ошиб, рекорд кўрсаткич — 2,5 миллиондан ортиқ автомобилни ташкил этди. Хитой, Европа ва АҚШ каби учта йирик электромобиль бозоридан ташқари, дунёнинг қолган ҳудудларида сотилаётган электромобилларнинг 55 фоизи Хитойдан импорт қилинади.