Crypto.com Pay хизмати орқали криптовалюта билан харидлар учун тўлов қилиш имконияти Дубай халқаро аэропорти (DXB) ва Ал-Мактум аэропортида (AMIA) ишга туширилди.
Дубай ҳукумати матбуот хизмати Dubai Media Office маълум қилишича, янги тўлов имконияти ҳам жисмоний дўконларда, ҳам интернет орқали буюртма расмийлаштиришда мавжуд. Тўлов амалга оширилаётганда харидор илова орқали транзакцияни тасдиқлаши керак, шундан сўнг маблағлар БАА дирҳамига айлантирилиб, сотувчига ўтказилади.
“Мижозлар Crypto.com Pay орқали хавфсиз ва узлуксиз тўлов жараёнидан фойда кўради, сотувчилар эса БАА дирҳамида (AED) тезкор ҳисоб-китобларни қабул қилади. Бу ҳамкорлик инновацион тўлов ечимларини тақдим этиш, шу билан бирга Дубайнинг рақамли савдонинг келажагида етакчилик қилишга интилишини қўллаб-қувватлашга бўлган умумий мақсадимизни акс эттиради”, — деди Crypto.com президенти ва бош операцион директори Эрик Анзиани.
Криптовалюта орқали тўловларни жорий этиш йирик чакана савдо операторларининг рақамли тўлов усулларига бўлган қизиқиши ортиб бораётгани ва мижозлар учун мавжуд тўлов воситаларини кенгайтириш тенденциясини акс эттиради.