Си Цзиньпин кутиб олиш маросимида сўзлаган нутқида унинг АҚШга ташрифи икки давлат ўртасидаги дўстлик ва ҳамкорликни мустаҳкамлаш, шунингдек, икки халқ фаровонлигини оширишга қаратилганини таъкидлади, деб ёзади Xinhua.
Унинг сўзларига кўра, Хитойнинг очиқликка бўлган ёндашуви ўзгармайди. Икки давлат манфаатлари ўзаро чамбарчас боғлиқ бўлиб, ҳамкорлик учун кенг имкониятлар мавжуд.
Хитой Халқ Республикаси Раиси АҚШ халқини мамлакат мустақиллигининг 250 йиллиги билан табриклади. У келгуси беш йил давомида Хитой 100 минг нафар америкалик ёшни таълим ва алмашинув дастурларида иштирок этиш учун мамлакатга таклиф қилишини маълум қилди. Шунингдек, яқин орада Атланта ҳайвонот боғида икки гигант панда пайдо бўлишини айтди.
Си Цзиньпин ўз нутқида ўзи ва АҚШ президенти икки давлатнинг ташқи сиёсат, савдо-иқтисодий, молия, ҳуқуқни муҳофаза қилиш, гуманитар ва бошқа соҳалардаги идоралари ўртасидаги алоқаларни мустаҳкамлашни қўллаб-қувватлашини таъкидлади.
“Хитой ва АҚШ ўртасидаги ҳамкорлик дунёдаги барча масалаларни ҳал қила олмайди, бироқ бундай ҳамкорликсиз кўплаб муаммоларни ҳал қилиш қийин”, — деди у.
Си Цзиньпин Дональд Трамп билан биргаликда Хитой-Америка муносабатларининг «катта кемаси» барқарор ва узоқ муддатли ривожланишига йўналиш беришга тайёр эканини таъкидлади.
Ўз навбатида, АҚШ президенти Дональд Трамп Си Цзиньпиннинг ташрифи давомида сунъий интеллектнинг келажаги муҳокама қилинишини айтди. Америка етакчисининг сўзларини CNN келтирди.
Дональд Трамп АҚШ ва Хитой ўртасидаги савдо муносабатларида янги илгарилаш борлигини таъкидлаб, ўзи ва Си Цзиньпин икки давлат олдида турган масалаларни ҳал этишда сезиларли ютуқларга эришганини маълум қилди.
АҚШ президенти, шунингдек, май ойида Пекинга қилган ташрифини ва янги Савдо палатаси ташкил этилганини қайд этди. У янги тузилмани мутлақо янги механизм ҳамда «жуда муваффақиятли» лойиҳа деб атади.
“Бизнинг жамоаларимиз савдо муносабатларини мувозанатлаштириш учун ишламоқда. Бу америкалик фермерлар ва чорвадорларга янги бозорларга чиқиш имконини беришни ҳам ўз ичига олади”, — деди у.
Тантанали маросимдан сўнг Си Цзиньпин ва Дональд Трамп тор доирада учрашув ўтказди.
Эслатиб ўтамиз, аввалроқ Си Цзиньпиннинг 23-25 сентябрь кунлари АҚШга ташриф буюриши хабар қилинган эди.