Астанадан уй олиш керак, деганлар оз эмас - Мақсад Халқ
ASTANA. Kazinform - Мамлакатимизнинг турли ҳудудларидан Астанага ўз орзулари сари кўп одамлар келади. Кейинги пайтларда Алматида тез-тез зилзилалар қайд этилиб, пойтахтга кўчиб ўтиш ниятида бўлганлар сони ортиб бораётгани ҳақида сўз борди. Шу муносабат билан экспертлар Астанада квартираларнинг нархи ошиб бораётганини таъкидламоқда.
Krisha.kz эксперт бўлими тақдим этган маълумотларга кўра, жорий йил февраль ойидан иккиламчи бозорда уй-жой нархи пасайишни бошлаган.
“Мониторинг қилинган 18 та шаҳардан 9 тасида нархларнинг пасайиши қайд этилган. Айниқса, Ақтау шаҳрида у сезиларли даражада (2,4%). Астанада квартира нархи бир ой ичида 2 фоизга ошди. Алмати ва Чимкентда бироз ўсиш кузатилмоқда”, — дейилади тадқиқот мақоласида.
Квартира нархи энг юқори бўлган шаҳарлар (1 квадрат метр учун): Алмати – 724 минг тенге, Астана – 485 минг тенге, Чимкент – 421 минг тенге. Энг арзон квартиралар эса Қизилўрда (238 минг тенге) ва Ақтўбе (290 минг тенге) шаҳарларида жойлашган.
Таниқли эксперт Мақсат Ҳаликнинг фикрича, Астанада квартираларнинг нархи ошиши мумкин, бу нормал ҳолат.
“Пойтахтда хонадонлар нархи ошиши нормал ҳолат. Алматидаги зилзиладан кейин “Астанадан уй олиш керак” деганлар оз эмас. Ҳозир ҳам Алматида 6-қаватдан юқорида жойлашган квартираларнинг нархи пасайиб боряпти. Агар зилзилалар содир бўлиши давом этса, жанубий пойтахт аҳолиси бошқа вилоятларга кўчиб ўтмасдан, пойтахтга юз тутиши аниқ. Шунга кўра, Астанада квартиранинг нархи ошади. Бироқ нархнинг ошишини оддий ҳолат ва вақтинчалик ҳолат деб ҳисоблаш мумкин”, - дейди эксперт.